൧൬. ബന്ധുജീവകവഗ്ഗോ

൧. ബന്ധുജീവകത്ഥേരഅപദാനവണ്ണനാ

ചന്ദംവ വിമലം സുദ്ധന്തിആദികം ആയസ്മതോ ബന്ധുജീവകത്ഥേരസ്സ അപദാനം. അയമ്പായസ്മാ പുരിമബുദ്ധേസു കതാധികാരോ തത്ഥ തത്ഥ ഭവേ വിവട്ടൂപനിസ്സയാനി പുഞ്ഞാനി ഉപചിനന്തോ സിഖിസ്സ ഭഗവതോ കാലേ കുലഗേഹേ നിബ്ബത്തോ വിഞ്ഞുതം പത്തോ ഘരാവാസം സണ്ഠപേത്വാ വസന്തോ സിഖിസ്സ ഭഗവതോ രൂപകായസമ്പത്തിം ദിസ്വാ പസന്നമാനസോ ബന്ധുജീവകപുപ്ഫാനി ഗഹേത്വാ ഭഗവതോ പാദമൂലേ പൂജേസി. ഭഗവാ തസ്സ ചിത്തപ്പസാദവഡ്ഢനത്ഥായ അനുമോദനമകാസി. സോ യാവതായുതം ഠത്വാ തേനേവ പുഞ്ഞേന ദേവലോകേ നിബ്ബത്തോ ഛ കാമാവചരസമ്പത്തിയോ അനുഭവിത്വാ മനുസ്സേസു ച ചക്കവത്തിആദിസമ്പത്തിയോ അനുഭവിത്വാ ഇമസ്സ അമ്ഹാകം സമ്മാസമ്ബുദ്ധസ്സ ഉപ്പന്നകാലേ ഗഹപതികുലേ നിബ്ബത്തോ രൂപഗ്ഗയസഗ്ഗപ്പത്തോ സത്ഥു ധമ്മദേസനം സുത്വാ സദ്ധാജാതോ ഗേഹം പഹായ പബ്ബജിതോ അരഹത്തം പാപുണി.

൧. സോ പുബ്ബേനിവാസഞാണേന പുബ്ബേ കതകുസലകമ്മം അനുസ്സരിത്വാ സോമനസ്സജാതോ പുബ്ബചരിതാപദാനം പകാസേന്തോ ചന്ദംവ വിമലം സുദ്ധന്തിആദിമാഹ. തത്ഥ ചന്ദംവ വിമലം സുദ്ധന്തി അബ്ഭാ, മഹികാ, ധുമോ, രജോ, രാഹൂതി ഇമേഹി ഉപക്കിലേസമലേഹി വിമുത്തം ചന്ദം ഇവ ദിയഡ്ഢസഹസ്സുപക്കിലേസമലാനം പഹീനത്താ വിമലം നിക്കിലേസത്താ സുദ്ധം പസന്നം സിഖിം സമ്ബുദ്ധന്തി സമ്ബന്ധോ. കിലേസകദ്ദമാനം അഭാവേന അനാവിലം. നന്ദീഭവസങ്ഖാതായ ബലവസ്നേഹായ പരിസമന്തതോ ഖീണത്താ നന്ദീഭവപരിക്ഖീണം. തിണ്ണം ലോകേതി ലോകത്തയതോ തിണ്ണം ഉത്തിണ്ണം അതിക്കന്തം. വിസത്തികന്തി വിസത്തികം വുച്ചതി തണ്ഹാ, നിത്തണ്ഹന്തി അത്ഥോ.

൨. നിബ്ബാപയന്തം ജനതന്തി ധമ്മവസ്സം വസ്സന്തോ ജനതം ജനസമൂഹം കിലേസപരിളാഹാഭാവേന നിബ്ബാപയന്തം വൂപസമേന്തം. സയം സംസാരതോ തിണ്ണം, സബ്ബസത്തേ സംസാരതോ താരയന്തം അതിക്കമേന്തം ചതുന്നം സച്ചാനം മുനനതോ ജാനനതോ മുനിം സിഖിം സമ്ബുദ്ധന്തി സമ്ബന്ധോ. വനസ്മിം ഝായമാനന്തി ആരമ്മണൂപനിജ്ഝാനലക്ഖണൂപനിജ്ഝാനേഹി ഝായന്തം ചിന്തേന്തം ചിത്തേന ഭാവേന്തം വനമജ്ഝേതി അത്ഥോ. ഏകഗ്ഗം ഏകഗ്ഗചിത്തം സുസമാഹിതം സുട്ഠു ആരമ്മണേ ആഹിതം ഠപിതചിത്തം സിഖിം മുനിം ദിസ്വാതി സമ്ബന്ധോ.

൩. ബന്ധുജീവകപുപ്ഫാനീതി ബന്ധൂനം ഞാതീനം ജീവകം ജീവിതനിസ്സയം ഹദയമംസലോഹിതം ബന്ധുജീവകം ഹദയമംസലോഹിതസമാനവണ്ണം പുപ്ഫം ബന്ധുജീവകപുപ്ഫം ഗഹേത്വാ സിഖിനോ ലോകബന്ധുനോ പൂജേസിന്തി അത്ഥോ. സേസം ഉത്താനത്ഥമേവാതി.

ബന്ധുജീവകത്ഥേരഅപദാനവണ്ണനാ സമത്താ.

൨. തമ്ബപുപ്ഫിയത്ഥേരഅപദാനവണ്ണനാ

പരകമ്മായനേ യുത്തോതിആദികം ആയസ്മതോ തമ്ബപുപ്ഫിയത്ഥേരസ്സ അപദാനം. അയമ്പി ആയസ്മാ പുരിമബുദ്ധേസു കതാധികാരോ തത്ഥ തത്ഥ ഭവേ വിവട്ടൂപനിസ്സയാനി പുഞ്ഞാനി ഉപചിനന്തോ പിയദസ്സിസ്സ ഭഗവതോ കാലേ കേനചി പുരേ കതേന അകുസലകമ്മേന ദുഗ്ഗതകുലേ നിബ്ബത്തോ വുദ്ധിപ്പത്തോ പരേസം കമ്മം കത്വാ ഭതിയാ ജീവികം കപ്പേസി. സോ ഏവം ദുക്ഖേന വസന്തോ പരേസം അപരാധം കത്വാ മരണഭയേന പലായിത്വാ വനം പാവിസി. തത്ഥ ഗതട്ഠാനേ പാടലിബോധിം ദിസ്വാ വന്ദിത്വാ സമ്മജ്ജിത്വാ ഏകസ്മിം രുക്ഖേ തമ്ബവണ്ണം പുപ്ഫം ദിസ്വാ തം സബ്ബം കണ്ണികേ ഓചിനിത്വാ ബോധിപൂജം അകാസി. തത്ഥ ചിത്തം പസാദേത്വാ വന്ദിത്വാ പല്ലങ്കമാഭുജിത്വാ നിസീദി. തസ്മിം ഖണേ തേ മനുസ്സാ പദാനുപദികം അനുബന്ധിത്വാ തത്ഥ അഗമംസു. സോ തേ ദിസ്വാ ബോധിം ആവജ്ജേന്തോവ പലായിത്വാ ഭയാനകേ ഗീരിദുഗ്ഗപപാതേ പതിത്വാ മരി.

൭. സോ ബോധിപൂജായ അനുസ്സരിതത്താ തേനേവ പീതിസോമനസ്സേന താവതിംസാദീസു ഉപപന്നോ ഛ കാമാവചരസമ്പത്തിം അനുഭവിത്വാ മനുസ്സേസു ച ചക്കവത്തിആദിസമ്പത്തിം അനുഭവിത്വാ ഇമസ്മിം ബുദ്ധുപ്പാദേ വിഭവസമ്പന്നേ കുലേ നിബ്ബത്തോ വുദ്ധിപ്പത്തോ സത്ഥു ധമ്മദേസനം സുത്വാ പസന്നമാനസോ പബ്ബജിത്വാ നചിരസ്സേവ അരഹാ ഹുത്വാ അത്തനോ പുബ്ബകമ്മം സരിത്വാ സോമനസ്സജാതോ പുബ്ബചരിതാപദാനം പകാസേന്തോ പരകമ്മായനേ യുത്തോതിആദിമാഹ. തത്ഥ പരേസം കമ്മാനി പരകമ്മാനി, പരകമ്മാനം ആയനേ കരണേ വാഹനേ ധാരണേ യുത്തോ യോജിതോ അഹോസിന്തി അത്ഥോ. സേസം പാകടമേവാതി.

തമ്ബപുപ്ഫിയത്ഥേരഅപദാനവണ്ണനാ സമത്താ.

൩. വീഥിസമ്മജ്ജകത്ഥേരഅപദാനവണ്ണനാ

ഉദേന്തം സതരംസിം വാതിആദികം ആയസ്മതോ വീഥിസമ്മജ്ജകത്ഥേരസ്സ അപദാനം. അയമ്പി പുരിമബുദ്ധേസു കതാധികാരോ അനേകേസു ജാതിസതേസു കതപുഞ്ഞസഞ്ചയോ സിഖിസ്സ ഭഗവതോ കാലേ കുലഗേഹേ നിബ്ബത്തോ ഘരാവാസം വസന്തോ നഗരവാസീഹി സദ്ധിം വീഥിം സജ്ജേത്വാ നീയമാനം ഭഗവന്തം ദിസ്വാ പസന്നമാനസോ വീഥിം സമം കത്വാ ധജം തത്ഥ ഉസ്സാപേസി.

൧൫. സോ തേനേവ പുഞ്ഞേന ദേവമനുസ്സേസു സംസരന്തോ ഉഭയസമ്പത്തിയോ അനുഭവിത്വാ ഇമസ്മിം ബുദ്ധുപ്പാദേ ഏകസ്മിം കുലേ നിബ്ബത്തോ വിഞ്ഞുതം പത്വാ സത്ഥു ധമ്മദേസനം സുത്വാ പടിലദ്ധസദ്ധോ ബഹുമാനഹദയോ പബ്ബജിത്വാ ലദ്ധൂപസമ്പദോ നചിരസ്സേവ അരഹാ ഹുത്വാ അത്തനോ പുബ്ബകമ്മം അനുസ്സരന്തോ പച്ചക്ഖതോ ജാനിത്വാ പുബ്ബചരിതാപദാനം പകാസേന്തോ ഉദേന്തം സതരംസിം വാതിആദിമാഹ. തത്ഥ ഉദേന്തം ഉഗ്ഗച്ഛന്തം സതരംസിം സതപഭം. സതരംസീതി ദേസനാസീസമത്തം, അനേകസതസഹസ്സപഭം സൂരിയം ഇവാതി അത്ഥോ. പീതരംസിംവ ഭാണുമന്തി പീതരംസിം സംകുചിതപഭം ഭാണുമം പഭാവന്തം ചന്ദമണ്ഡലം ഇവ സമ്ബുദ്ധം ദിസ്വാതി അത്ഥോ. സേസം സുവിഞ്ഞേയ്യമേവാതി.

വീഥിസമ്മജ്ജകത്ഥേരഅപദാനവണ്ണനാ സമത്താ.

൪. കക്കാരുപുപ്ഫപൂജകത്ഥേരഅപദാനവണ്ണനാ

ദേവപുത്തോ അഹം സന്തോതിആദികം ആയസ്മതോ കക്കാരുപുപ്ഫപൂജകത്ഥേരസ്സ അപദാനം. അയമ്പി പുരിമബുദ്ധേസു കതാധികാരോ തത്ഥ തത്ഥ ഭവേ കതപുഞ്ഞസഞ്ചയോ സിഖിസ്സ ഭഗവതോ കാലേ ഭുമ്മട്ഠകദേവപുത്തോ ഹുത്വാ നിബ്ബത്തോ സിഖിം സമ്മാസമ്ബുദ്ധം ദിസ്വാ ദിബ്ബകക്കാരുപുപ്ഫം ഗഹേത്വാ പൂജേസി.

൨൧. സോ തേന പുഞ്ഞേന ദേവമനുസ്സേസു സംസരന്തോ ഏകതിംസകപ്പബ്ഭന്തരേ ഉഭയസുഖം അനുഭവിത്വാ ഇമസ്മിം ബുദ്ധുപ്പാദേ സാവത്ഥിയം കുലഗേഹേ നിബ്ബത്തോ വുദ്ധിമന്വായ സത്ഥരി പസന്നോ പബ്ബജിത്വാ നചിരസ്സേവ അരഹാ ഹുത്വാ അത്തനോ പുബ്ബകമ്മം പച്ചക്ഖതോ ഞത്വാ സോമനസ്സജാതോ പുബ്ബചരിതാപദാനം പകാസേന്തോ ദേവപുത്തോ അഹം സന്തോതിആദിമാഹ. തത്ഥ ദിബ്ബന്തി കീളന്തി പഞ്ചഹി ദിബ്ബേഹി കാമഗുണേഹീതി ദേവാ, ദേവാനം പുത്തോ, ദേവോ ഏവ വാ പുത്തോ ദേവപുത്തോ, അഹം ദേവപുത്തോ സന്തോ വിജ്ജമാനോ ദിബ്ബം കക്കാരുപുപ്ഫം പഗ്ഗയ്ഹ പകാരേന, ഗഹേത്വാ സിഖിസ്സ ഭഗവതോ അഭിരോപയിം പൂജേസിന്തി അത്ഥോ. സേസം ഉത്താനത്ഥമേവാതി.

കക്കാരുപുപ്ഫപൂജകത്ഥേരഅപദാനവണ്ണനാ സമത്താ.

൫. മന്ദാരവപുപ്ഫപൂജകത്ഥേരഅപദാനവണ്ണനാ

ദേവപുത്തോ അഹം സന്തോതിആദികം ആയസ്മതോ മന്ദാരവപുപ്ഫപൂജകത്ഥേരസ്സ അപദാനം. അയമ്പി ഥേരോ പുരിമബുദ്ധേസു കതാധികാരോ തത്ഥ തത്ഥ ഭവേ വിവട്ടൂപനിസ്സയാനി പുഞ്ഞാനി ഉപചിനന്തോ സിഖിസ്സ ഭഗവതോ കാലേ ഭുമ്മട്ഠകദേവപുത്തോ ഹുത്വാ നിബ്ബത്തോ സിഖിം ഭഗവന്തം ദിസ്വാ പസന്നമാനസോ ദിബ്ബമന്ദാരവപുപ്ഫേഹി പൂജേസി.

൨൫. സോ തേന പുഞ്ഞേനാതിആദികം സബ്ബം അനന്തരത്ഥേരസ്സ അപദാനവണ്ണനായ വുത്തനയേനേവ വേദിതബ്ബന്തി.

മന്ദാരവപുപ്ഫപൂജകത്ഥേരഅപദാനവണ്ണനാ സമത്താ.

൬. കദമ്ബപുപ്ഫിയത്ഥേരഅപദാനവണ്ണനാ

ഹിമവന്തസ്സാവിദൂരേതിആദികം ആയസ്മതോ കദമ്ബപുപ്ഫിയത്ഥേരസ്സ അപദാനം. അയമ്പി പുരിമജിനവരേസു കതാധികാരോ തത്ഥ തത്ഥ ഭവേ വിവട്ടൂപനിസ്സയാനി പുഞ്ഞാനി ഉപചിനന്തോ സമ്മാസമ്ബുദ്ധസുഞ്ഞേ ലോകേ ഏകസ്മിം കുലേ നിബ്ബത്തോ വുദ്ധിമന്വായ ഘരാവാസം വസന്തോ തത്ഥ ആദീനവം ദിസ്വാ ഘരാവാസം പഹായ താപസപബ്ബജ്ജം പബ്ബജിത്വാ ഹിമവന്തസമീപേ കുക്കുടേ നാമ പബ്ബതേ അസ്സമം കത്വാ വിഹാസി. സോ തത്ഥ സത്ത പച്ചേകബുദ്ധേ ദിസ്വാ പസന്നമാനസോ പുപ്ഫിതം കദമ്ബപുപ്ഫം ഓചിനിത്വാ തേ പച്ചേകബുദ്ധേ പൂജേസി. തേപി ‘‘ഇച്ഛിതം പത്ഥിത’’ന്തിആദിനാ അനുമോദനം അകംസു.

൩൦. സോ തേന പുഞ്ഞേന ദേവമനുസ്സേസു സംസരന്തോ ഉഭയസമ്പത്തിയോ അനുഭവിത്വാ ഇമസ്മിം ബുദ്ധുപ്പാദേ സാവത്ഥിയം കുലഗേഹേ നിബ്ബത്തോ വുദ്ധിമന്വായ സത്ഥു ധമ്മദേസനം സുത്വാ പടിലദ്ധസദ്ധോ പബ്ബജിത്വാ നചിരസ്സേവ അരഹാ ഹുത്വാ പുബ്ബകമ്മം സരിത്വാ സോമനസ്സജാതോ പുബ്ബചരിതാപദാനം പകാസേന്തോ ഹിമവന്തസ്സാവിദൂരേതിആദിമാഹ. തം വുത്തത്ഥമേവ. കുക്കുടോ നാമ പബ്ബതോതി തസ്സ ഉഭോസു പസ്സേസു കുക്കുടചൂളാകാരേന പബ്ബതകൂടാനം വിജ്ജമാനത്താ കുക്കുടോതി സങ്ഖം ഗതോ. പകാരേന തിരോ ഹുത്വാ പതിട്ഠഹതീതി പബ്ബതോ. തമ്ഹി പബ്ബതപാദമ്ഹീതി തസ്മിം പബ്ബതസമീപേ. സത്ത ബുദ്ധാ വസന്തീതി സത്ത പച്ചേകബുദ്ധാ തസ്മിം കുക്കുടപബ്ബതപാദേ പണ്ണസാലായം വസന്തീതി അത്ഥോ.

൩൧. ദീപരാജംവ ഉഗ്ഗതന്തി ദീപാനം രാജാ ദീപരാജാ, സബ്ബേസം ദീപാനം ജലമാനാനം താരകാനം രാജാ ചന്ദോതി അത്ഥോ. അഥ വാ സബ്ബേസു ജമ്ബുദീപപുബ്ബവിദേഹഅപരഗോയാനഉത്തരകുരുസങ്ഖാതേസു ചതൂസു ദീപേസു ദ്വിസഹസ്സപരിത്തദീപേസു ച രാജാ ആലോകഫരണതോ ചന്ദോ ദീപരാജാതി വുച്ചതി, തം നഭേ ഉഗ്ഗതം ചന്ദം ഇവ പുപ്ഫിതം ഫുല്ലിതം കദമ്ബരുക്ഖം ദിസ്വാ തതോ പുപ്ഫം ഓചിനിത്വാ ഉഭോഹി ഹത്ഥേഹി പഗ്ഗയ്ഹ പകാരേന ഗഹേത്വാ സത്ത പച്ചേകബുദ്ധേ സമോകിരിം സുട്ഠു ഓകിരിം, ആദരേന പൂജേസിന്തി അത്ഥോ. സേസം ഉത്താനത്ഥമേവാതി.

കദമ്ബപുപ്ഫിയത്ഥേരഅപദാനവണ്ണനാ സമത്താ.

൭. തിണസൂലകത്ഥേരഅപദാനവണ്ണനാ

ഹിമവന്തസ്സാവിദൂരേതിആദികം ആയസ്മതോ തിണസൂലകത്ഥേരസ്സ അപദാനം. അയമ്പി ഥേരോ പുരിമജിനവരേസു കതപുഞ്ഞസമ്ഭാരോ ഉപ്പന്നുപ്പന്നഭവേ കുസലാനി ഉപചിനന്തോ സിഖിസ്സ ഭഗവതോ കാലേ കുലഗേഹേ നിബ്ബത്തോ ഘരാവാസം സണ്ഠപേത്വാ തത്ഥ ദോസം ദിസ്വാ തം പഹായ താപസപബ്ബജ്ജം പബ്ബജിത്വാ വസന്തോ ഹിമവന്തസമീപേ ഭൂതഗണേ നാമ പബ്ബതേ വസന്തം ഏകതം വിവേകമനുബ്രൂഹന്തം സിഖിം സമ്ബുദ്ധം ദിസ്വാ പസന്നമാനസോ തിണസൂലപുപ്ഫം ഗഹേത്വാ പാദമൂലേ പൂജേസി. ബുദ്ധോപി തസ്സ അനുമോദനം അകാസി.

൩൫. സോ തേന പുഞ്ഞേന ദേവമനുസ്സേസു സംസരന്തോ ഉഭയസമ്പത്തിയോ അനുഭവിത്വാ ഇമസ്മിം ബുദ്ധുപ്പാദേ സാവത്ഥിയം വിഭവസമ്പന്നേ ഏകസ്മിം കുലേ നിബ്ബത്തോ വുദ്ധിമന്വായ സാസനേ പസന്നോ പബ്ബജിത്വാ ഉപനിസ്സയസമ്പന്നത്താ നചിരസ്സേവ അരഹത്തം പാപുണിത്വാ പുബ്ബകമ്മം സരിത്വാ സോമനസ്സപ്പത്തോ പുബ്ബചരിതാപദാനം പകാസേന്തോ ഹിമവന്തസ്സാവിദൂരേതിആദിമാഹ. ഭൂതഗണോ നാമ പബ്ബതോതി ഭൂതഗണാനം ദേവയക്ഖസമൂഹാനം ആവാസഭൂതത്താ ഭവനസദിസത്താ അവിരൂള്ഹഭാവേന പവത്തത്താ ച ഭൂതഗണോ നാമ പബ്ബതോ, തസ്മിം ഏകോ അദുതിയോ ജിനോ ജിതമാരോ ബുദ്ധോ വസതേ ദിബ്ബബ്രഹ്മഅരിയഇരിയാപഥവിഹാരേഹി വിഹരതീതി അത്ഥോ.

൩൬. ഏകൂനസതസഹസ്സം, കപ്പം ന വിനിപാതികോതി തേന തിണസൂലപുപ്ഫപൂജാകരണഫലേന നിരന്തരം ഏകൂനസതസഹസ്സകപ്പാനം അവിനിപാതകോ ചതുരാപായവിനിമുത്തോ സഗ്ഗസമ്പത്തിഭവമേവ ഉപപന്നോതി അത്ഥോ. സേസം സുവിഞ്ഞേയ്യമേവാതി.

തിണസൂലകത്ഥേരഅപദാനവണ്ണനാ സമത്താ.

൮. നാഗപുപ്ഫിയത്ഥേരഅപദാനവണ്ണനാ

സുവച്ഛോ നാമ നാമേനാതിആദികം ആയസ്മതോ നാഗപുപ്ഫിയത്ഥേരസ്സ അപദാനം. അയമ്പി ഥേരോ പുരിമജിനനിസഭേസു കതാധികാരോ തത്ഥ തത്ഥ ഭവേ വിവട്ടൂപനിസ്സയാനി പുഞ്ഞാനി ഉപചിനന്തോ പദുമുത്തരഭഗവതോ കാലേ ബ്രാഹ്മണകുലേ നിബ്ബത്തോ വുദ്ധിപ്പത്തോ വേദത്തയാദീസു സകസിപ്പേസു നിപ്ഫത്തിം പത്വാ തത്ഥ സാരം അദിസ്വാ ഹിമവന്തം പവിസിത്വാ താപസപബ്ബജ്ജം പബ്ബജിത്വാ ഝാനസമാപത്തിസുഖേന വീതിനാമേസി. തസ്മിം സമയേ പദുമുത്തരോ ഭഗവാ തസ്സാനുകമ്പായ തത്ഥ അഗമാസി. സോ താപസോ തം ഭഗവന്തം ദിസ്വാ ലക്ഖണസത്ഥേസു ഛേകത്താ ഭഗവതോ ലക്ഖണരൂപസമ്പത്തിയാ പസന്നോ വന്ദിത്വാ അഞ്ജലിം പഗ്ഗയ്ഹ അട്ഠാസി. ആകാസതോ അനോതിണ്ണത്താ പൂജാസക്കാരേ അകതേയേവ ആകാസേനേവ പക്കാമി. അഥ സോ താപസോ സസിസ്സോ നാഗപുപ്ഫം ഓചിനിത്വാ തേന പുപ്ഫേന ഭഗവതോ ഗതദിസാഭാഗമഗ്ഗം പൂജേസി.

൩൯. സോ തേന പുഞ്ഞേന ദേവമനുസ്സേസു സംസരന്തോ ഉഭയസമ്പത്തിയോ അനുഭവന്തോ സബ്ബത്ഥ പൂജിതോ ഇമസ്മിം ബുദ്ധുപ്പാദേ സാവത്ഥിയം കുലഗേഹേ നിബ്ബത്തോ വുദ്ധിമന്വായ സദ്ധാസമ്പന്നോ പബ്ബജിത്വാ വത്തപടിപത്തിയാ സാസനം സോഭയമാനോ നചിരസ്സേവ അരഹാ ഹുത്വാ ‘‘കേന നു ഖോ കുസലകമ്മേന മയാ അയം ലോകുത്തരസമ്പത്തി ലദ്ധാ’’തി അതീതകമ്മം സരന്തോ പുബ്ബകമ്മം പച്ചക്ഖതോ ഞത്വാ സഞ്ജാതസോമനസ്സോ പുബ്ബചരിതാപദാനം പകാസേന്തോ സുവച്ഛോ നാമ നാമേനാതിആദിമാഹ. തത്ഥ വച്ഛഗോത്തേ ജാതത്താ വച്ഛോ, സുന്ദരോ ച സോ വച്ഛോ ചേതി സുവച്ഛോ. നാമേന സുവച്ഛോ നാമ ബ്രാഹ്മണോ മന്തപാരഗൂ വേദത്തയാദിസകലമന്തസത്ഥേ കോടിപ്പത്തോതി അത്ഥോ. സേസം ഹേട്ഠാ വുത്തനയത്താ ഉത്താനത്ഥമേവാതി.

നാഗപുപ്ഫിയത്ഥേരഅപദാനവണ്ണനാ സമത്താ.

൯. പുന്നാഗപുപ്ഫിയത്ഥേരഅപദാനവണ്ണനാ

കാനനം വനമോഗയ്ഹാതിആദികം ആയസ്മതോ പുന്നാഗപുപ്ഫിയത്ഥേരസ്സ അപദാനം. അയമ്പി പുരിമജിനവരേസു കതാധികാരോ തത്ഥ തത്ഥ ഭവേ വിവട്ടൂപനിസ്സയാനി പുഞ്ഞാനി ഉപചിനന്തോ ഫുസ്സസ്സ ഭഗവതോ കാലേ നേസാദകുലേ നിബ്ബത്തോ മഹാവനം പവിട്ഠോ തത്ഥ സുപുപ്ഫിതപുന്നാഗപുപ്ഫം ദിസ്വാ ഹേതുസമ്പന്നത്താ ബുദ്ധാരമ്മണപീതിവസേന ഭഗവന്തം സരിത്വാ തം പുപ്ഫം സഹ കണ്ണികാഹി ഓചിനിത്വാ വാലുകാഹി ചേതിയം കത്വാ പൂജേസി.

൪൬. സോ തേന പുഞ്ഞേന ദ്വേനവുതികപ്പേ നിരന്തരം ദേവമനുസ്സസമ്പത്തിയോയേവ അനുഭവിത്വാ ഇമസ്മിം ബുദ്ധുപ്പാദേ സാവത്ഥിയം വിഭവസമ്പന്നേ കുലേ നിബ്ബത്തോ വുദ്ധിമന്വായ പുബ്ബവാസനാബലേന സാസനേ പസന്നോ പബ്ബജിത്വാ വായമന്തോ നചിരസ്സേവ അരഹാ ഹുത്വാ പുബ്ബേ കതകുസലം സരിത്വാ സോമനസ്സജാതോ പുബ്ബചരിതാപദാനം പകാസേന്തോ കാനനം വനമോഗയ്ഹാതിആദിമാഹ. തം സബ്ബം ഹേട്ഠാ വുത്തത്താ ഉത്താനത്ഥമേവാതി.

പുന്നാഗപുപ്ഫിയത്ഥേരഅപദാനവണ്ണനാ സമത്താ.

൧൦. കുമുദദായകത്ഥേരഅപദാനവണ്ണനാ

ഹിമവന്തസ്സാവിദൂരേതിആദികം ആയസ്മതോ കുമുദദായകത്ഥേരസ്സ അപദാനം. അയമ്പി ഥേരോ പുരിമബുദ്ധേസു കതാധികാരോ അനേകേസു ഭവേസു വിവട്ടൂപനിസ്സയാനി പുഞ്ഞാനി ഉപചിനന്തോ പദുമുത്തരസ്സ ഭഗവതോ കാലേ ഹിമവന്തസ്സ ആസന്നേ മഹന്തേ ജാതസ്സരേ കുകുത്ഥോ നാമ പക്ഖീ ഹുത്വാ നിബ്ബത്തോ കേനചി അകുസലേന പക്ഖീ സമാനോപി പുബ്ബേ കതസമ്ഭാരേന ബുദ്ധിസമ്പന്നോ പുഞ്ഞാപുഞ്ഞേസു ഛേകോ സീലവാ പാണഗോചരതോ പടിവിരതോ അഹോസി. തസ്മിം സമയേ പദുമുത്തരോ ഭഗവാ ആകാസേനാഗന്ത്വാ തസ്സ സമീപേ ചങ്കമതി. അഥ സോ സകുണോ ഭഗവന്തം ദിസ്വാ പസന്നചിത്തോ കുമുദപുപ്ഫം ഡംസിത്വാ ഭഗവതോ പാദമൂലേ പൂജേസി. ഭഗവാ തസ്സ സോമനസ്സുപ്പാദനത്ഥം പടിഗ്ഗഹേത്വാ അനുമോദനമകാസി.

൫൧. സോ തേന പുഞ്ഞേന ദേവമനുസ്സേസു ഉഭയസമ്പത്തിസുഖം അനുഭവിത്വാ ഇമസ്മിം ബുദ്ധുപ്പാദേ സാവത്ഥിയം അഞ്ഞതരസ്മിം കുലേ നിബ്ബത്തോ വുദ്ധിമന്വായ മഹദ്ധനോ മഹാഭോഗോ രതനത്തയേ പസന്നോ സത്ഥു ധമ്മദേസനം സുത്വാ പടിലദ്ധസദ്ധോ പബ്ബജിത്വാ നചിരസ്സേവ അരഹാ ഹുത്വാ അത്തനോ പുബ്ബകമ്മം പച്ചക്ഖതോ ഞത്വാ സോമനസ്സജാതോ പുബ്ബചരിതാപദാനം പകാസേന്തോ ഹിമവന്തസ്സാവിദൂരേതിആദിമാഹ. പദുമുപ്പലസഞ്ഛന്നോതി ഏത്ഥ സതപത്തേഹി സമ്പുണ്ണോ സേതപദുമോ ച തീണി നീലരത്തസേതുപ്പലാനി ച പദുമുപ്പലാനി തേഹി സഞ്ഛന്നോ ഗഹനീഭൂതോ സമ്പുണ്ണോ മഹാജാതസ്സരോ അഹൂതി സമ്ബന്ധോ. പുണ്ഡരീകസമോത്ഥടോതി പുണ്ഡരീകേഹി രത്തപദുമേഹി ഓത്ഥടോ സമ്പുണ്ണോതി അത്ഥോ. സേസം സുവിഞ്ഞേയ്യമേവാതി.

കുമുദദായകത്ഥേരഅപദാനവണ്ണനാ സമത്താ.

സോളസമവഗ്ഗവണ്ണനാ സമത്താ.