൩. ഉപ്പലഹത്ഥിയത്ഥേരഅപദാനവണ്ണനാ

തിവരായം നിവാസീഹന്തിആദികം ആയസ്മതോ ഉപ്പലഹത്ഥകത്ഥേരസ്സ അപദാനം. അയമ്പി പുരിമജിനവരേസു കതകുസലോ തത്ഥ തത്ഥ ഭവേ വിവട്ടൂപനിസ്സയാനി പുഞ്ഞാനി ഉപചിനന്തോ സിദ്ധത്ഥസ്സ ഭഗവതോ കാലേ മാലാകാരകുലേ നിബ്ബത്തോ വുദ്ധിമന്വായ മാലാകാരകമ്മേന അനേകാനി പുപ്ഫാനി വിക്കിണന്തോ ജീവതി. അഥേകദിവസം പുപ്ഫാനി ഗഹേത്വാ ചരന്തോ ഭഗവന്തം രതനഗ്ഘികമിവ ചരമാനം ദിസ്വാ രത്തുപ്പലകലാപേന പൂജേസി. സോ തതോ ചുതോ തേനേവ പുഞ്ഞേന സുഗതീസു പുഞ്ഞമനുഭവിത്വാ ഇമസ്മിം ബുദ്ധുപ്പാദേ കുലഗേഹേ നിബ്ബത്തോ വുദ്ധിമന്വായ സദ്ധാജാതോ പബ്ബജിത്വാ നചിരസ്സേവ അരഹാ അഹോസി.

൧൩. സോ അപരഭാഗേ അത്തനോ പുബ്ബകമ്മം സരിത്വാ സോമനസ്സജാതോ പുബ്ബചരിതാപദാനം പകാസേന്തോ തിവരായം നിവാസീഹന്തിആദിമാഹ. തത്ഥ തിവരാതി തീഹി വാരേഹി കാരിതം സഞ്ചരിതം പടിച്ഛന്നം നഗരം, തസ്സം തിവരായം നിവാസീ, വസനസീലോ നിവാസനട്ഠാനഗേഹേ വാ വസന്തോ അഹന്തി അത്ഥോ. അഹോസിം മാലികോ തദാതി തദാ നിബ്ബാനത്ഥായ പുഞ്ഞസമ്ഭാരകരണസമയേ മാലികോ മാലാകാരോവ പുപ്ഫാനി കയവിക്കയം കത്വാ ജീവന്തോ അഹോസിന്തി അത്ഥോ.

൧൪. പുപ്ഫഹത്ഥമദാസഹന്തി സിദ്ധത്ഥം ഭഗവന്തം ദിസ്വാ ഉപ്പലകലാപം അദാസിം പൂജേസിന്തി അത്ഥോ. സേസം സബ്ബത്ഥ ഉത്താനത്ഥമേവാതി.

ഉപ്പലഹത്ഥകത്ഥേരഅപദാനവണ്ണനാ സമത്താ.