൪. പദപൂജകത്ഥേരഅപദാനവണ്ണനാ

സിദ്ധത്ഥസ്സ ഭഗവതോതിആദികം ആയസ്മതോ പദപൂജകത്ഥേരസ്സ അപദാനം. അയമ്പി പുരിമബുദ്ധേസു കതാധികാരോ സിദ്ധത്ഥസ്സ ഭഗവതോ കാലേ കുലഗേഹേ നിബ്ബത്തോ വുദ്ധിമന്വായ സത്ഥരി പസന്നോ സുമനപുപ്ഫേന പാദമൂലേ പൂജേസി. സോ തേന പുഞ്ഞേന ദേവമനുസ്സേസു സംസരന്തോ സക്കസമ്പത്തിം അനുഭവിത്വാ ഇമസ്മിം ബുദ്ധുപ്പാദേ ഏകസ്മിം കുലഗേഹേ നിബ്ബത്തോ വുദ്ധിമന്വായ സത്ഥരി പസീദിത്വാ പബ്ബജിതോ വിപസ്സനം വഡ്ഢേത്വാ അരഹത്തഫലേ പതിട്ഠാസി.

൧൯. സോ അപരഭാഗേ അത്തനോ പുബ്ബകമ്മം സരിത്വാ സോമനസ്സജാതോ പുബ്ബചരിതാപദാനം പകാസേന്തോ സിദ്ധത്ഥസ്സ ഭഗവതോതിആദിമാഹ. ജാതിപുപ്ഫമദാസഹന്തി ജാതിസുമനപുപ്ഫം അദാസിം അഹന്തി വത്തബ്ബേ ഗാഥാബന്ധസുഖത്ഥം സുമനസദ്ദസ്സ ലോപം കത്വാ വുത്തം. തത്ഥ ജാതിയാ നിബ്ബത്തോ വികസമാനോയേവ സുമനം ജനാനം സോമനസ്സം കരോതീതി സുമനം, പുപ്ഫനട്ഠേന വികസനട്ഠേന പുപ്ഫം, സുമനഞ്ച തം പുപ്ഫഞ്ചാതി സുമനപുപ്ഫം, താനി സുമനപുപ്ഫാനി സിദ്ധത്ഥസ്സ ഭഗവതോ അഹം പൂജേസിന്തി അത്ഥോ. സേസം സബ്ബത്ഥ ഉത്താനമേവാതി.

പദപൂജകത്ഥേരഅപദാനവണ്ണനാ സമത്താ.