൧൦. രേണുപൂജകത്ഥേരഅപദാനവണ്ണനാ

സുവണ്ണവണ്ണം സമ്ബുദ്ധന്തിആദികം ആയസ്മതോ രേണുപൂജകത്ഥേരസ്സ അപദാനം. അയമ്പി പുരിമജിനവരേസു കതാധികാരോ തത്ഥ തത്ഥ ഭവേ വിവട്ടൂപനിസ്സയാനി പുഞ്ഞാനി ഉപചിനന്തോ വിപസ്സിസ്സ ഭഗവതോ കാലേ കുലഗേഹേ നിബ്ബത്തോ വുദ്ധിമന്വായ സത്ഥരി പസന്നോ വിഞ്ഞുതം പത്തോ അഗ്ഗിക്ഖന്ധം വിയ വിജ്ജോതമാനം ഭഗവന്തം ദിസ്വാ പസന്നമാനസോ നാഗപുപ്ഫകേസരം ഗഹേത്വാ പൂജേസി. അഥ ഭഗവാ അനുമോദനമകാസി.

൬൨-൩. സോ തേന പുഞ്ഞേന തതോ ചുതോ ദേവമനുസ്സേസു സംസരന്തോ ഉഭയസമ്പത്തിയോ അനുഭവിത്വാ ഉപ്പന്നുപ്പന്നഭവേ സബ്ബത്ഥ പൂജിതോ ഇമസ്മിം ബുദ്ധുപ്പാദേ കുലഗേഹേ നിബ്ബത്തോ വിഞ്ഞുതം പത്തോ പുബ്ബവാസനാബലേന സത്ഥരി പസന്നോ സാസനേ പബ്ബജിതോ നചിരസ്സേവ അരഹാ ഹുത്വാ ദിബ്ബചക്ഖുനാ അത്തനോ പുബ്ബകമ്മം ദിസ്വാ സോമനസ്സജാതോ പുബ്ബചരിതാപദാനം പകാസേന്തോ സുവണ്ണവണ്ണം സമ്ബുദ്ധന്തിആദിമാഹ. തം ഹേട്ഠാ വുത്തത്ഥമേവ. സതരംസിംവ ഭാണുമന്തി സതമത്താ സതപ്പമാണാ രംസി പഭാ യസ്സ സൂരിയസ്സ സോ സതരംസി, ഗാഥാബന്ധസുഖത്ഥം സതരംസീതി വുത്തം, അനേകസതസ്സ അനേകസതസഹസ്സരംസീതി അത്ഥോ. ഭാണു വുച്ചതി പഭാ, ഭാണു പഭാ യസ്സ സോ ഭാണുമാ, ഭാണുമസങ്ഖാതം സൂരിയം ഇവ വിപസ്സിം ഭഗവന്തം ദിസ്വാ സകേസരം നാഗപുപ്ഫം ഗഹേത്വാ അഭിരോപയിം പൂജേസിന്തി അത്ഥോ. സേസം ഉത്താനമേവാതി.

രേണുപൂജകത്ഥേരഅപദാനവണ്ണനാ സമത്താ.

ഏകാദസമവഗ്ഗവണ്ണനാ സമത്താ.