൫. ഗന്ധമാലിയത്ഥേരഅപദാനവണ്ണനാ

സിദ്ധത്ഥസ്സ ഭഗവതോതിആദികം ആയസ്മതോ ഗന്ധമാലിയത്ഥേരസ്സ അപദാന. അയമ്പി പുരിമബുദ്ധേസു കതാധികാരോ സിദ്ധത്ഥസ്സ ഭഗവതോ കാലേ കുലഗേഹേ നിബ്ബത്തോ മഹദ്ധനോ മഹാഭോഗോ അഹോസി. സോ സത്ഥരി പസീദിത്വാ ചന്ദനാഗരുകപ്പൂരകസ്സതുരാദീനി അനേകാനി സുഗന്ധാനി വഡ്ഢേത്വാ സത്ഥു ഗന്ധഥൂപം കാരേസി. തസ്സുപരി സുമനപുപ്ഫേഹി ഛാദേസി, ബുദ്ധഞ്ച അട്ഠങ്ഗനമക്കാരം അകാസി. സോ തേന പുഞ്ഞകമ്മേന ദേവമനുസ്സേസു സമ്പത്തിയോ അനുഭവിത്വാ ഇമസ്മിം ബുദ്ധുപ്പാദേ വിഭവസമ്പന്നേ ഏകസ്മിം കുലഗേഹേ നിബ്ബത്തോ വുദ്ധിമന്വായ സത്ഥരി പസീദിത്വാ പബ്ബജിതോ നചിരസ്സേവ അരഹാ അഹോസി.

൨൪. സോ അപരഭാഗേ അത്തനോ പുബ്ബകമ്മം സരിത്വാ സോമനസ്സജാതോ പുബ്ബചരിതാപദാനം പകാസേന്തോ സിദ്ധത്ഥസ്സ ഭഗവതോതിആദിമാഹ. തം സബ്ബം ഉത്താനത്ഥമേവാതി.

ഗന്ധമാലിയത്ഥേരഅപദാനവണ്ണനാ സമത്താ.