൪. സൂചിദായകത്ഥേരഅപദാനവണ്ണനാ

കമ്മാരോഹം പുരേ ആസിന്തിആദികം ആയസ്മതോ സൂചിദായകത്ഥേരസ്സ അപദാനം. അയമ്പി പുരിമബുദ്ധേസു കതാധികാരോ അന്തരന്തരാ കുസലബീജാനി പൂരേന്തോ വിപസ്സിസ്സ ഭഗവതോ കാലേ അന്തരന്തരാ കതേന ഏകേന കമ്മച്ഛിദ്ദേന കമ്മാരകുലേ നിബ്ബത്തോ വുദ്ധിമന്വായ സകസിപ്പേസു നിപ്ഫത്തിം പത്തോ സത്ഥു ധമ്മദേസനം സുത്വാ പസന്നമാനസോ ചീവരസിബ്ബനത്ഥായ സൂചിദാനമദാസി, തേന പുഞ്ഞേന ദിബ്ബസമ്പത്തിം അനുഭവിത്വാ അപരഭാഗേ മനുസ്സേസു ഉപ്പന്നോ ചക്കവത്താദയോ സമ്പത്തിയോ ച അനുഭവന്തോ ഉപ്പന്നുപ്പന്നഭവേ തിക്ഖപഞ്ഞോ വജീരഞാണോ അഹോസി. സോ കമേന ഇമസ്മിം ബുദ്ധുപ്പാദേ നിബ്ബത്തോ വുദ്ധിപ്പത്തോ മഹദ്ധനോ സദ്ധാജാതോ തിക്ഖപഞ്ഞോ അഹോസി. സോ ഏകദിവസം സത്ഥു ധമ്മദേസനം സുത്വാ ധമ്മാനുസാരേന ഞാണം പേസേത്വാ നിസിന്നാസനേയേവ അരഹാ അഹോസി.

൧൯. സോ അരഹാ സമാനോ അത്തനോ പുബ്ബകമ്മം സരിത്വാ സോമനസ്സജാതോ പുബ്ബചരിതാപദാനം പകാസേന്തോ കമ്മാരോഹം പുരേ ആസിന്തിആദിമാഹ. തത്ഥ കമ്മാരോതി അയോകമ്മലോഹകമ്മാദിനാ കമ്മേന ജീവതി രുഹതി വുദ്ധിം വിരൂള്ഹിം ആപജ്ജതീതി കമ്മാരോ, പുബ്ബേ പുഞ്ഞകരണകാലേ കമ്മാരോ ആസിം അഹോസിന്തി അത്ഥോ. സേസം സബ്ബത്ഥ ഉത്താനമേവാതി.

സൂചിദായകത്ഥേരഅപദാനവണ്ണനാ സമത്താ.