൨. ഉപ്പത്താനുപ്പത്തിവാരവണ്ണനാ

൯൯൧. ദുതിയവാരേ യേ ധമ്മാ കാമഭവേ കാമധാതുസമ്ഭൂതാനഞ്ച സത്താനം ഉപ്പജ്ജന്തി – കാമധാതുയം പരിയാപന്നാ വാ അപരിയാപന്നാ വാ – തേ സബ്ബേ സങ്ഗഹേത്വാ കാമധാതുയാ പഞ്ചക്ഖന്ധാതിആദി വുത്തം. രൂപധാതുആദീസുപി ഏസേവ നയോ. യസ്മാ പന രൂപധാതുപരിയാപന്നാനം സത്താനം ഘാനായതനാദീനം അഭാവേന ഗന്ധായതനാദീനി ആയതനാദികിച്ചം ന കരോന്തി, തസ്മാ രൂപധാതുയാ ഛ ആയതനാനി, നവ ധാതുയോതിആദി വുത്തം. യസ്മാ ച ഓകാസവസേന വാ സത്തുപ്പത്തിവസേന വാ അപരിയാപന്നധാതു നാമ നത്ഥി, തസ്മാ അപരിയാപന്നധാതുയാതി അവത്വാ യം യം അപരിയാപന്നം തം തദേവ ദസ്സേതും അപരിയാപന്നേ കതി ഖന്ധാതിആദി വുത്തം.