൩. പഞ്ഹാപുച്ഛകവണ്ണനാ

൪൮൨. പഞ്ഹാപുച്ഛകേ പാളിഅനുസാരേനേവ ബോജ്ഝങ്ഗാനം കുസലാദിഭാവോ വേദിതബ്ബോ. ആരമ്മണത്തികേസു പന സബ്ബേപേതേ അപ്പമാണം നിബ്ബാനം ആരബ്ഭ പവത്തിതോ അപ്പമാണാരമ്മണാ ഏവ, ന മഗ്ഗാരമ്മണാ. സഹജാതഹേതുവസേന പനേത്ഥ കുസലാ മഗ്ഗഹേതുകാ, വീരിയം വാ വീമംസം വാ ജേട്ഠകം കത്വാ മഗ്ഗഭാവനാകാലേ മഗ്ഗാധിപതിനോ, ഛന്ദചിത്തജേട്ഠികായ മഗ്ഗഭാവനായ ന വത്തബ്ബാ മഗ്ഗാധിപതിനോതി, ഫലകാലേപി ന വത്തബ്ബാ ഏവ.

അതീതാദീസു ഏകാരമ്മണഭാവേനപി ന വത്തബ്ബാ, നിബ്ബാനസ്സ പന ബഹിദ്ധാധമ്മത്താ ബഹിദ്ധാരമ്മണാ നാമ ഹോന്തീതി. ഏവമേതസ്മിം പഞ്ഹാപുച്ഛകേപി നിബ്ബത്തിതലോകുത്തരാവ ബോജ്ഝങ്ഗാ കഥിതാ. സമ്മാസമ്ബുദ്ധേന ഹി സുത്തന്തഭാജനീയസ്സേവ പഠമനയസ്മിം ലോകിയാ, ദുതിയതതിയേസു ലോകിയലോകുത്തരമിസ്സകാ ബോജ്ഝങ്ഗാ കഥിതാ. അഭിധമ്മഭാജനീയസ്സ പന ചതൂസുപി നയേസു ഇമസ്മിഞ്ച പഞ്ഹാപുച്ഛകേ ലോകുത്തരായേവാതി ഏവമയം ബോജ്ഝങ്ഗവിഭങ്ഗോപി തേപരിവട്ടം നീഹരിത്വാവ ഭാജേത്വാ ദസ്സിതോതി.

സമ്മോഹവിനോദനിയാ വിഭങ്ഗട്ഠകഥായ

ബോജ്ഝങ്ഗവിഭങ്ഗവണ്ണനാ നിട്ഠിതാ.