൨. അഭിധമ്മഭാജനീയവണ്ണനാ

൪൭൨. അഭിധമ്മഭാജനീയേ സത്തപി ബോജ്ഝങ്ഗേ ഏകതോ പുച്ഛിത്വാ വിസ്സജ്ജനസ്സ ച പാടിയേക്കം പുച്ഛിത്വാ വിസ്സജ്ജനസ്സ ച വസേന ദ്വേ നയാ. തേസം അത്ഥവണ്ണനാ ഹേട്ഠാ വുത്തനയേനേവ വേദിതബ്ബാ.

ഉപേക്ഖാസമ്ബോജ്ഝങ്ഗനിദ്ദേസേ പന ഉപേക്ഖനവസേന ഉപേക്ഖാ. ഉപേക്ഖനാകാരോ ഉപേക്ഖനാ. ഉപേക്ഖിതബ്ബയുത്തേ സമപ്പവത്തേ ധമ്മേ ഇക്ഖതി, ന ചോദേതീതി ഉപേക്ഖാ. പുഗ്ഗലം ഉപേക്ഖാപേതീതി ഉപേക്ഖനാ. ബോജ്ഝങ്ഗഭാവപ്പത്തിയാ ലോകിയഉപേക്ഖനായ അധികാ ഉപേക്ഖനാ അജ്ഝുപേക്ഖനാ. അബ്യാപാരാപജ്ജനേന മജ്ഝത്തഭാവോ മജ്ഝത്തതാ. സാ പന ചിത്തസ്സ, ന സത്തസ്സാതി ദീപേതും മജ്ഝത്തതാ ചിത്തസ്സാതി വുത്തന്തി. അയമേത്ഥ അനുപുബ്ബപദവണ്ണനാ.

നയാ പനേത്ഥ ഗണേതബ്ബാ – സത്തന്നമ്പി ഹി ബോജ്ഝങ്ഗാനം ഏകതോ പുച്ഛിത്വാ വിസ്സജ്ജനേ ഏകേകമഗ്ഗേ നയസഹസ്സം നയസഹസ്സന്തി ചത്താരി നയസഹസ്സാനി വിഭത്താനി. പാടിയേക്കം പുച്ഛിത്വാ വിസ്സജ്ജനേ ഏകേകബോജ്ഝങ്ഗവസേന ചത്താരി ചത്താരീതി സത്ത ചതുക്കാ അട്ഠവീസതി. താനി പുരിമേഹി ചതൂഹി സദ്ധിം ദ്വത്തിംസാതി സബ്ബാനിപി അഭിധമ്മഭാജനീയേ ദ്വത്തിംസ നയസഹസ്സാനി വിഭത്താനി കുസലാനേവ. യസ്മാ പന ഫലക്ഖണേപി ബോജ്ഝങ്ഗാ ലബ്ഭന്തി, കുസലഹേതുകാനി ച സാമഞ്ഞഫലാനി, തസ്മാ തേസുപി ബോജ്ഝങ്ഗദസ്സനത്ഥം കുസലനിദ്ദേസപുബ്ബങ്ഗമായ ഏവ തന്തിയാ വിപാകനയോ ആരദ്ധോ. സോപി ഏകതോ പുച്ഛിത്വാ വിസ്സജ്ജനസ്സ ച, പാടിയേക്കം പുച്ഛിത്വാ വിസ്സജ്ജനസ്സ ച വസേന ദുവിധോ ഹോതി. സേസമേത്ഥ ഹേട്ഠാ വുത്തനയേനേവ വേദിതബ്ബം. വിപാകേ പന കുസലതോ തിഗുണാ നയാ കാതബ്ബാതി.

അഭിധമ്മഭാജനീയവണ്ണനാ.