൪. സങ്ഖാരക്ഖന്ധനിദ്ദേസോ

൨൦. സങ്ഖാരക്ഖന്ധനിദ്ദേസേ യേ കേചി സങ്ഖാരാതി ചതുഭൂമികസങ്ഖാരേ പരിയാദിയതി. ചക്ഖുസമ്ഫസ്സജാ ചേതനാതിആദീനി അതീതാദിവസേന നിദ്ദിട്ഠസങ്ഖാരേ സഭാവതോ ദസ്സേതും വുത്താനി. ചക്ഖുസമ്ഫസ്സജാതിആദീനി വുത്തത്ഥാനേവ. ചേതനാതി ഹേട്ഠിമകോടിയാ പധാനസങ്ഖാരവസേന വുത്തം. ഹേട്ഠിമകോടിയാ ഹി അന്തമസോ ചക്ഖുവിഞ്ഞാണേന സദ്ധിം പാളിയം ആഗതാ ചത്താരോ സങ്ഖാരാ ഉപ്പജ്ജന്തി. തേസു ചേതനാ പധാനാ ആയൂഹനട്ഠേന പാകടത്താ. തസ്മാ അയമേവ ഗഹിതാ. തംസമ്പയുത്തസങ്ഖാരാ പന തായ ഗഹിതായ ഗഹിതാവ ഹോന്തി. ഇധാപി പുരിമാ പഞ്ച ചക്ഖുപസാദാദിവത്ഥുകാവ. മനോസമ്ഫസ്സജാ ഹദയവത്ഥുകാപി അവത്ഥുകാപി. സബ്ബാ ചതുഭൂമികചേതനാ. സേസം വേദനാക്ഖന്ധസദിസമേവാതി.

അയം സങ്ഖാരക്ഖന്ധനിദ്ദേസോ.