൬. അതീതക്ഖന്ധാദികഥാ

൧. നസുത്തസാധനകഥാവണ്ണനാ

൨൯൭. ഇദാനി ‘‘അതീതം ഖന്ധാ’’തിആദികഥാ ഹോതി. തത്ഥ ഖന്ധാദിഭാവാവിജഹനതോ അതീതാനാഗതാനം അത്ഥിതം ഇച്ഛന്തസ്സ അതീതം ഖന്ധാതി പുച്ഛാ പരവാദിസ്സ, അതീതസ്സ ഖന്ധസങ്ഗഹിതത്താ ആമന്താതി പടിഞ്ഞാ സകവാദിസ്സ. പുന അതീതം നത്ഥീതി പുച്ഛാ പരവാദിസ്സ, തസ്സ നിരുത്തിപഥസുത്തേന അത്ഥിതായ വാരിതത്താ പടിക്ഖേപോ സകവാദിസ്സ. ആയതനധാതുപുച്ഛാസുപി അനാഗതപഞ്ഹേസുപി പച്ചുപ്പന്നേന സദ്ധിം സംസന്ദിത്വാ അനുലോമപടിലോമതോ ആഗതപഞ്ഹേസുപി ‘‘അതീതം രൂപ’’ന്തിആദിപഞ്ഹേസുപി ഇമിനാവുപായേന അത്ഥോ വേദിതബ്ബോ.

൨. സുത്തസാധനവണ്ണനാ

൨൯൮. സുത്തസാധനേ പന ന വത്തബ്ബന്തി പുച്ഛാ സകവാദിസ്സ. തത്ഥ നത്ഥി ചേതേതി നത്ഥി ച ഏതേ ധമ്മാതി അത്ഥോ. ഖന്ധാദിഭാവേ സതി നത്ഥിതം അനിച്ഛന്തസ്സ ആമന്താതി പടിഞ്ഞാ പരവാദിസ്സ, അഥ നേസം നത്ഥിഭാവസാധനത്ഥം സുത്താഹരണം സകവാദിസ്സ. ദുതിയപുച്ഛാപി പരവാദിസ്സ, പടിഞ്ഞാ സകവാദിസ്സ, സുത്താഹരണം പരവാദിസ്സ. തം പന നേസം ഖന്ധാദിഭാവമേവ സാധേതി, ന അത്ഥിഭാവന്തി ആഹടമ്പി അനാഹടസദിസമേവാതി.

അതീതം ഖന്ധാതിആദികഥാവണ്ണനാ.