൧. വാദയുത്തിവണ്ണനാ

൨൮൨. ഇദാനി സബ്ബമത്ഥീതിവാദകഥാ നാമ ഹോതി. തത്ഥ യേസം ‘‘യം കിഞ്ചി രൂപം അതീതാനാഗതപച്ചുപ്പന്നം…പേ… അയം വുച്ചതി രൂപക്ഖന്ധോ’’തിആദിവചനതോ (വിഭ. ൨) ‘‘സബ്ബേപി അതീതാദിഭേദാ ധമ്മാ ഖന്ധസഭാവം ന വിജഹന്തി, തസ്മാ സബ്ബം അത്ഥിയേവ നാമാ’’തി ലദ്ധി, സേയ്യഥാപി ഏതരഹി സബ്ബമത്ഥിവാദാനം, തേസം ലദ്ധിവിസോധനത്ഥം സബ്ബമത്ഥീതി പുച്ഛാ സകവാദിസ്സ, വുത്തപ്പകാരായ ലദ്ധിയാ ഠത്വാ പടിഞ്ഞാ ഇതരസ്സ. സബ്ബഥാതി സബ്ബസ്മിം സരീരേ സബ്ബമത്ഥീതി പുച്ഛതി. സബ്ബദാതി സബ്ബസ്മിം കാലേ സബ്ബമത്ഥീതി പുച്ഛതി. സബ്ബേന സബ്ബന്തി സബ്ബേനാകാരേന സബ്ബമത്ഥീതി പുച്ഛതി. സബ്ബേസൂതി സബ്ബേസു ധമ്മേസു സബ്ബമത്ഥീതി പുച്ഛതി. അയോഗന്തി അയുത്തം. നാനാസഭാവാനഞ്ഹി യോഗോ ഹോതി, ന ഏകസഭാവസ്സ. ഇതി ഇമസ്മിം പഞ്ഹേ രൂപം വേദനായ, വേദനം വാ രൂപേന അനാനം ഏകലക്ഖണമേവ കത്വാ സബ്ബമത്ഥീതി പുച്ഛതി. യമ്പി നത്ഥി തമ്പത്ഥീതി യമ്പി ഛട്ഠഖന്ധാദികം സസവിസാണാദികം വാ കിഞ്ചി നത്ഥീതി സിദ്ധം, തമ്പി തേ അത്ഥീതി പുച്ഛതി. സബ്ബമത്ഥീതി യാ ദിട്ഠി സാ ദിട്ഠി മിച്ഛാദിട്ഠീതി, യാ ദിട്ഠി സാ ദിട്ഠി സമ്മാദിട്ഠീതി ഹേവമത്ഥീതി ഇമിനാ ഇദം പുച്ഛതി – യാ തേ ഏസാ സബ്ബമത്ഥീതി ദിട്ഠി, സാ ദിട്ഠി അയാഥാവകത്താ മിച്ഛാദിട്ഠീതി ഏവം യാ അമ്ഹാകം ദിട്ഠി, സാ ദിട്ഠി യാഥാവകത്താ സമ്മാദിട്ഠീതി ഏവം തവ സമയേ അത്ഥീതി പുച്ഛതി. ഇതരോ സബ്ബേസുപി ഏതേസു നയേസു വുത്തപ്പകാരായ അത്ഥിതായ അഭാവതോ പടിക്ഖിപതി. ഇമേസു പന സബ്ബേസുപി നയേസു ‘‘ആജാനാഹി നിഗ്ഗഹ’’ന്തി ആദിം കത്വാ സബ്ബോ കഥാമഗ്ഗഭേദോ വിത്ഥാരതോ വേദിതബ്ബോതി അയം താവേത്ഥ വാദയുത്തി.