൧൩-൧൮. അനുലോമപച്ചനീയപട്ഠാനവണ്ണനാ

൧. ഇദാനി കുസലാദീസു ധമ്മേസു പച്ചയധമ്മം അപ്പടിക്ഖിപിത്വാ പച്ചയുപ്പന്നസ്സ കുസലാദിഭാവപടിക്ഖേപവസേന ധമ്മാനം അനുലോമപച്ചനീയതായ ലദ്ധനാമം അനുലോമപച്ചനീയപട്ഠാനം ദസ്സേതും കുസലം ധമ്മം പടിച്ച ന കുസലോ ധമ്മോ ഉപ്പജ്ജതി ഹേതുപച്ചയാതിആദി ആരദ്ധം. തത്ഥ കുസലം ധമ്മം പടിച്ചാതി കുസലസ്സ പച്ചയഭാവം അനുജാനാതി. ന കുസലോ ധമ്മോ ഉപ്പജ്ജതീതി കുസലസ്സേവ ഉപ്പത്തിം വാരേതി. തസ്മാ ‘‘കുസലേ ഖന്ധേ പടിച്ച ചിത്തസമുട്ഠാനം രൂപ’’ന്തിആദിനാ നയേന വിസ്സജ്ജനം ദസ്സിതം, തം സബ്ബം പാളിം ഓലോകേത്വാ സാധുകം സല്ലക്ഖേതബ്ബം. യമ്പി യേന സദിസം, യഞ്ച യത്ഥ ലബ്ഭതി, യോ ച യേസം വിസ്സജ്ജനാനം യേസു പച്ചയേസു ഗണനപരിച്ഛേദോ, സോ സബ്ബോ പാളിയം ദസ്സിതോ, തസ്മാ പാളിയേവ ഏത്ഥ അത്ഥോ. യഥാ ചേത്ഥ, ഏവം ദുകപട്ഠാനാദീസുപീതി.

ഏത്താവതാ –

തികഞ്ച പട്ഠാനവരം ദുകുത്തമം,

ദുകം തികഞ്ചേവ തികം ദുകഞ്ച;

തികം തികഞ്ചേവ ദുകം ദുകഞ്ച,

ഛ അനുലോമപച്ചനീയമ്ഹി നയാ സുഗമ്ഭീരാതി. –

അട്ഠകഥായം വുത്തഗാഥായ ദീപിതാ ധമ്മാനുലോമപച്ചനീയപട്ഠാനേ ഛ നയാ നിദ്ദിട്ഠാ ഹോന്തി. പച്ചയവസേന പനേത്ഥ ഏകേകസ്മിം പട്ഠാനേ അനുലോമാദയോ ചത്താരോ ചത്താരോ നയാതി ഏകേന പരിയായേന ചതുവീസതിനയപടിമണ്ഡിതം അനുലോമപച്ചനീയപട്ഠാനഞ്ഞേവ വേദിതബ്ബം.

അനുലോമപച്ചനീയപട്ഠാനവണ്ണനാ.