൨. സംസന്ദനബ്രഹ്മചരിയവണ്ണനാ

൨൭൩. ഇദാനി യദി അഞ്ഞത്ഥ ഭാവിതേന മഗ്ഗേന അഞ്ഞത്ഥ ഫലസച്ഛികിരിയാ ഹോതി, സോതാപന്നാദീനമ്പി സിയാതി ഏതമത്ഥം ദസ്സേതും പുന അനാഗാമീതിആദീനം സംസന്ദനപുച്ഛാ സകവാദിസ്സ. തത്ഥ അനാഗാമിസ്സ ഫലസച്ഛികിരിയായ പടിഞ്ഞാ, സേസാനം ഫലസച്ഛികിരിയായ പടിക്ഖേപോ പരവാദിസ്സ. ഇധ ഭാവിതമഗ്ഗോ ഹി അനാഗാമീ ഇധവിഹായനിട്ഠോ നാമ ഹോതി. സോ ഇധ അനാഗാമിമഗ്ഗം ഭാവേത്വാ ‘‘ഓപപാതികോ തത്ഥപരിനിബ്ബായീ’’തി വചനതോ ‘‘പുന മഗ്ഗഭാവനം വിനാ ഉപപത്തിവസേനേവ അരഹത്തഫലം സച്ഛികരോതീ’’തി തസ്സ ലദ്ധി. സോതാപന്നസകദാഗാമിനോ പന തത്ഥ മഗ്ഗം ഭാവേത്വാ തത്രുപപത്തികാ നാമ ഹോന്തീതി തേസം ഇധാഗമനഞ്ഞേവ നത്ഥി. ഇതി സോ അനാഗാമിസ്സ ഫലസച്ഛികിരിയം പുട്ഠോ പടിജാനാതി. ഇതരേസം പടിക്ഖിപതി.

അനാഗാമീ പുഗ്ഗലോ തത്ഥ ഭാവിതേന മഗ്ഗേനാതി പഞ്ഹേ ‘‘അനാഗാമിനോ തത്ഥ മഗ്ഗഭാവനാവ നത്ഥീ’’തി ലദ്ധിയാ പടിക്ഖിപതി. മഗ്ഗോ ച ഭാവീയതി, ന ച കിലേസാ പഹീയന്തീതി പുച്ഛാ സകവാദിസ്സ, രൂപാവചരമഗ്ഗം സന്ധായ പടിഞ്ഞാ ഇതരസ്സ. രൂപാവചരമഗ്ഗേന ഹി സോ ഇധവിഹായനിട്ഠോ നാമ ജാതോ.

അനാഗാമീ പുഗ്ഗലോ കതകരണീയോതി പഞ്ഹേ ‘‘ഓപപാതികോ തത്ഥപരിനിബ്ബായീ’’തി വചനതോ ഉപപത്തിയാവസ്സ കതകരണീയാദിഭാവം സന്ധായ പടിജാനാതി. അരഹാതി പഞ്ഹേ ഇധപരിനിബ്ബായിനോ അരഹതോ വസേനേവ പടിക്ഖിപതി. പുന പുട്ഠോ തത്ഥപരിനിബ്ബായിനോ വസേന പടിജാനാതി.

അത്ഥി അരഹതോ പുനബ്ഭവോതിആദീസുപി തത്ഥപരിനിബ്ബായീ ഇധപരിനിബ്ബായീനം വസേനേവ അത്ഥോ വേദിതബ്ബോ. അപ്പടിവിദ്ധാകുപ്പോവ തത്ഥപരിനിബ്ബായതീതി പുട്ഠോ ഇധേവ ഭാവിതേന മഗ്ഗേന തസ്സ അകുപ്പപടിവേധം ഇച്ഛന്തോ പടിക്ഖിപതി.

യഥാ മിഗോതി പഠമം ഉദാഹരണം പരവാദിസ്സ, ദുതിയം സകവാദിസ്സ. സേസം സബ്ബത്ഥ ഉത്താനത്ഥമേവാതി.

ബ്രഹ്മചരിയകഥാ നിട്ഠിതാ.