൪. ഉപാദിന്നത്തികവണ്ണനാ

൫൧. ഉപാദിന്നുപാദാനിയത്തികസ്സ പഞ്ഹാവാരേ വത്ഥു ഉപാദാനിയാനം ഖന്ധാനം പുരേജാതപച്ചയേന പച്ചയോതി പവത്തിം സന്ധായ വുത്തം. പടിസന്ധിയം പന തം പുരേജാതം ന ഹോതി.

൭൨. ഉപാദിന്നുപാദാനിയോ കബളീകാരോ ആഹാരോ ഉപാദിന്നുപാദാനിയസ്സ കായസ്സ ആഹാരപച്ചയേന പച്ചയോതി ഏത്ഥ ഉപാദിന്നുപാദാനിയോ കബളീകാരാഹാരോ നാമ കമ്മസമുട്ഠാനാനം രൂപാനം അബ്ഭന്തരഗതാ ഓജാ. ഉപാദിന്നുപാദാനിയസ്സ കായസ്സാതി തസ്സേവ കമ്മസമുട്ഠാനരൂപകായസ്സ ആഹാരപച്ചയേന പച്ചയോ. രൂപജീവിതിന്ദ്രിയം വിയ കടത്താരൂപാനം അനുപാലനഉപത്ഥമ്ഭനവസേന പച്ചയോ, ന ജനകവസേന. യം പന മണ്ഡൂകാദയോ ഗിലിത്വാ ഠിതാനം അഹിആദീനം കായസ്സ ജീവമാനകമണ്ഡൂകാദിസരീരേ ഓജാ ആഹാരപച്ചയേന പച്ചയോതി വദന്തി, തം ന ഗഹേതബ്ബം. ന ഹി ജീവമാനകസരീരേ ഓജാ അഞ്ഞസ്സ സരീരസ്സ ആഹാരപച്ചയതം സാധേതി. അനുപാദിന്നുപാദാനിയസ്സ കായസ്സാതി ഏത്ഥ പന ജനകവസേനാപി ലബ്ഭതി. ഉപാദിന്നുപാദാനിയസ്സ ച അനുപാദിന്നുപാദാനിയസ്സ ചാതി ഏത്ഥ ഏകസ്സ ഉപത്ഥമ്ഭകവസേന, ഏകസ്സ ജനകവസേന, ഉഭിന്നമ്പി വാ ഉപത്ഥമ്ഭകവസേനേവ വുത്തോ. ദ്വേ പന ആഹാരാ ഏകതോ പച്ചയാ ഹോന്താ ഉപത്ഥമ്ഭകാവ ഹോന്തി, ന ജനകാ. സേസമേത്ഥ പാളിമേവ സാധുകം ഓലോകേത്വാ വേദിതബ്ബം.

ഉപാദിന്നത്തികവണ്ണനാ.