൩. ആനേഞ്ജകഥാവണ്ണനാ

൮൯൬. ഇദാനി ആനേഞ്ജകഥാ നാമ ഹോതി. തത്ഥ ഭഗവാ ചതുത്ഥജ്ഝാനേ ഠിതോ പരിനിബ്ബായീതി സല്ലക്ഖേത്വാ ‘‘അരഹാ ആനേഞ്ജേ ഠിതോ പരിനിബ്ബായതീ’’തി യേസം ലദ്ധി, സേയ്യഥാപി ഏകച്ചാനം ഉത്തരാപഥകാനം, തേ സന്ധായ പുച്ഛാ സകവാദിസ്സ, പടിഞ്ഞാ ഇതരസ്സ. പകതിചിത്തേതി ഭവങ്ഗചിത്തേ. സബ്ബേ ഹി സഞ്ഞിനോ സത്താ ഭവങ്ഗചിത്തേ ഠത്വാ ഭവങ്ഗപരിയോസാനേന ചുതിചിത്തേന കാലം കരോന്തി. ഇതി നം ഇമിനാ അത്ഥേന ചോദേതും ഏവമാഹ. തത്ഥ കിഞ്ചാപി ചതുവോകാരഭവേ അരഹതോ പകതിചിത്തമ്പി ആനേഞ്ജം ഹോതി, അയം പന പഞ്ഹോ പഞ്ചവോകാരഭവവസേന ഉദ്ധടോ. തസ്മാ നോ ച വത രേ വത്തബ്ബേതി ആഹ. സേസമേത്ഥ ഉത്താനത്ഥമേവാതി.

ആനേഞ്ജകഥാവണ്ണനാ.