൩. സഞ്ഞോജനകഥാവണ്ണനാ

൮൮൧-൮൮൨. ഇദാനി സഞ്ഞോജനകഥാ നാമ ഹോതി. തത്ഥ യസ്മാ അരഹാ സബ്ബം ബുദ്ധവിസയം ന ജാനാതി, തസ്മാ തസ്സ തത്ഥ അവിജ്ജാവിചികിച്ഛാഹി അപ്പഹീനാഹി ഭവിതബ്ബന്തി സഞ്ഞായ ‘‘അത്ഥി കിഞ്ചി സഞ്ഞോജനം അപ്പഹായ അരഹത്തപ്പത്തീ’’തി യേസം ലദ്ധി, സേയ്യഥാപി മഹാസങ്ഘികാനം, തേ സന്ധായ പുച്ഛാ സകവാദിസ്സ, പടിഞ്ഞാ ഇതരസ്സ. അത്ഥി കിഞ്ചി സക്കായദിട്ഠീതിആദി അരഹതോ സബ്ബസംയോജനപ്പഹാനദസ്സനത്ഥം വുത്തം. സബ്ബം ബുദ്ധവിസയന്തി പഞ്ഹദ്വയേ അരഹതോ സബ്ബഞ്ഞുതഞ്ഞാണാഭാവേന പടിസേധോ കതോ, ന അവിജ്ജാവിചികിച്ഛാനം അപ്പഹാനേന. ഇതരോ പന തേസം അപ്പഹീനതം സന്ധായ തേന ഹീതി ലദ്ധിം പതിട്ഠപേതി. സാ അയോനിസോ പതിട്ഠാപിതത്താ അപ്പതിട്ഠിതാവ ഹോതീതി.

സഞ്ഞോജനകഥാവണ്ണനാ.