൪. തിരച്ഛാനകഥാവണ്ണനാ

൮൬൯-൮൭൧. ഇദാനി തിരച്ഛാനകഥാ നാമ ഹോതി. തത്ഥ ദേവേസു ഏരാവണാദയോ ദേവപുത്താ ഹത്ഥിവണ്ണം അസ്സവണ്ണം വികുബ്ബന്തി, നത്ഥി തത്ഥ തിരച്ഛാനഗതാ. യേസം പന തിരച്ഛാനവണ്ണിനോ ദേവപുത്തേ ദിസ്വാ ‘‘അത്ഥി ദേവേസു തിരച്ഛാനഗതാ’’തി ലദ്ധി, സേയ്യഥാപി അന്ധകാനം; തേ സന്ധായ പുച്ഛാ സകവാദിസ്സ, പടിഞ്ഞാ ഇതരസ്സ. അഥ നം ‘‘യദി ദേവയോനിയം തിരച്ഛാനഗതാ സിയും, തിരച്ഛാനയോനിയമ്പി ദേവാ സിയു’’ന്തി ചോദേതും അത്ഥി തിരച്ഛാനഗതേസൂതിആദിമാഹ. കീടാതിആദി യേസം സോ അഭാവം ഇച്ഛതി, തേ ദസ്സേതും വുത്തം. ഏരാവണോതി പഞ്ഹേ തസ്സ അത്ഥിതായ പടിഞ്ഞാ സകവാദിസ്സ, ന തിരച്ഛാനഗതസ്സ. ഹത്ഥിബന്ധാതിആദി ‘‘യദി തത്ഥ ഹത്ഥിആദയോ സിയും, ഹത്ഥിബന്ധാദയോപി സിയു’’ന്തി ചോദനത്ഥം വുത്തം. തത്ഥ യാവസികാതി യവസ്സ ദായകാ. കാരണികാതി ഹത്ഥാചരിയാദയോ, യേഹി തേ നാനാവിധം കാരണം കരേയ്യും. ഭത്തകാരകാതി ഹത്ഥിആദീനം ഭത്തരന്ധകാ. ന ഹേവന്തി തഥാ അനിച്ഛന്തോ പടിക്ഖിപതീതി.

തിരച്ഛാനകഥാവണ്ണനാ.