൪. പത്തികഥാവണ്ണനാ

൮൩൭-൮൪൦. ഇദാനി പത്തികഥാ നാമ ഹോതി. തത്ഥ ‘‘യം യം പടിലബ്ഭതി, തസ്സ തസ്സ പടിലാഭോ പത്തി നാമ. സാ ച അസങ്ഖതാ’’തി യേസം ലദ്ധി, സേയ്യഥാപി പുബ്ബസേലിയാനഞ്ഞേവ; തേ സന്ധായ പുച്ഛാ സകവാദിസ്സ, പടിഞ്ഞാ ഇതരസ്സ. സേസമിധാപി ഹേട്ഠാ വുത്തനയത്താ യഥാപാളിമേവ നിയ്യാതീതി. ന വത്തബ്ബന്തിആദി യായ ലദ്ധിയാ പത്തി അസങ്ഖതാതി മഞ്ഞതി, തം പകാസേതും വുത്തം. തത്ഥ സകവാദീ ‘‘ന ഹേവം വത്തബ്ബേ’’തി പടിക്ഖിപന്തോ കേവലം പത്തിയാ രൂപാദിഭാവം ന സമ്പടിച്ഛതി. ന ഹി പത്തി നാമ കോചി ധമ്മോ അത്ഥി, ന പന അസങ്ഖതഭാവം അനുജാനാതി. ഇതരോ പന പടിക്ഖേപമത്തേനേവ അസങ്ഖതാതി ലദ്ധിം പതിട്ഠപേതി, സാ അയോനിസോ പതിട്ഠാപിതത്താ അപ്പതിട്ഠിതായേവാതി.

പത്തികഥാവണ്ണനാ.