൩. സുഖാനുപ്പദാനകഥാവണ്ണനാ

൭൪൭-൭൪൮. ഇദാനി സുഖാനുപ്പദാനകഥാ നാമ ഹോതി. തത്ഥ ‘‘ബഹൂനം വത നോ ഭഗവാ സുഖധമ്മാനം ഉപഹത്താ’’തി (മ. നി. ൨.൧൪൮) സുത്തം നിസ്സായ പരോ പരസ്സ സുഖം അനുപ്പദേതീതി യേസം ലദ്ധി, സേയ്യഥാപി ഹേതുവാദാനം; തേ സന്ധായ പുച്ഛാ സകവാദിസ്സ, പടിഞ്ഞാ ഇതരസ്സ. ദുക്ഖം അനുപ്പദേതീതി പുട്ഠോ പന താദിസം സുത്തപദം അപസ്സന്തോ പടിക്ഖിപതി. അത്തനോ സുഖന്തിആദിപഞ്ഹേ യം അത്തനോ പരസ്സ വാ, തം അനുപ്പദാതും ന സക്കാ. യം തസ്സേവ, കിം തത്ഥ അനുപ്പദാനം നാമാതി പടിക്ഖിപതി. നേവത്തനോതിആദിപഞ്ഹേ പന യം ഏവരൂപം, ന തം അനുപ്പദിന്നം നാമ ഭവിതുമരഹതീതി ലദ്ധിയാപടിജാനാതി. നോ ച വത രേതിതാദിസസ്സ സുഖസ്സ അഭാവാ വുത്തം. സുഖധമ്മാനം ഉപഹത്താതിവചനം ഭഗവതോ പരേസം സുഖുപ്പത്തിയാ പച്ചയഭാവം ദീപേതി, ന അന്നാദീനം വിയ സുഖസ്സ അനുപ്പദാനം, തസ്മാ അസാധകന്തി.

സുഖാനുപ്പദാനകഥാവണ്ണനാ.