൭. പരിയാപന്നകഥാവണ്ണനാ

൭൦൩-൭൦൫. ഇദാനി പരിയാപന്നകഥാ നാമ ഹോതി. തത്ഥ യസ്മാ കാമരാഗോ കാമധാതും അനുസേതി, കാമധാതുപരിയാപന്നോതി ച വുച്ചതി, തസ്മാ രൂപരാഗാരൂപരാഗാപി രൂപധാതുഅരൂപധാതുയോ അനുസേന്തി. രൂപധാതുഅരൂപധാതുപരിയാപന്നായേവ ച നാമ ഹോന്തീതി യേസം ലദ്ധി, സേയ്യഥാപി അന്ധകാനഞ്ചേവ സമ്മിതിയാനഞ്ച; തേ സന്ധായ രൂപരാഗോതി പുച്ഛാ സകവാദിസ്സ, പടിഞ്ഞാ ഇതരസ്സ. തത്ഥ അനുസേതീതി യഥാ കാമരാഗോ കാമവിതക്കസങ്ഖാതം കാമധാതും സഹജാതവസേന അനുസേതി, കിം തേ ഏവം രൂപരാഗോ രൂപധാതുന്തി പുച്ഛതി. പരിയാപന്നോതി യഥാ ച സോ തിവിധായ കാമധാതുയാ കിലേസകാമവസേന പരിയാപന്നത്താ കാമധാതുപരിയാപന്നോ, കിം തേ ഏവം രൂപരാഗോപി രൂപധാതുപരിയാപന്നോതി പുച്ഛതി. ഇതരോ പനസ്സ അധിപ്പായം അസല്ലക്ഖേന്തോ കേവലം ലദ്ധിവസേന ആമന്താതി പടിജാനാതി. അഥ നം തമത്ഥം സല്ലക്ഖാപേതും കുസലവിപാകകിരിയസങ്ഖാതേഹി സമാപത്തേസിയാദീഹി സംസന്ദിത്വാ പുച്ഛിതും സമാപത്തേസിയോതിആദിമാഹ. സേസമേത്ഥ യഥാപാളിമേവ നിയ്യാതി. നനു കാമരാഗോതിആദിവചനമ്പി കാമരാഗസ്സേവ കാമധാതുയം അനുസയഭാവം പരിയാപന്നതഞ്ച ദീപേതി, ന ഇതരേസം ഇതരധാതൂസൂതി.

പരിയാപന്നകഥാവണ്ണനാ.