൩. അനന്തരപച്ചയകഥാവണ്ണനാ

൬൯൩-൬൯൭. ഇദാനി അനന്തരപച്ചയകഥാ നാമ ഹോതി. തത്ഥ നച്ചഗീതാദീസു രൂപദസ്സനസദ്ദസവനാദീനം ലഹുപരിവത്തിതം ദിസ്വാ ‘‘ഇമാനി വിഞ്ഞാണാനി അഞ്ഞമഞ്ഞസ്സ അനന്തരാ ഉപ്പജ്ജന്തീ’’തി യേസം ലദ്ധി, സേയ്യഥാപി ഉത്തരാപഥകാനം; തേ സന്ധായ ചക്ഖുവിഞ്ഞാണസ്സാതി പുച്ഛാ സകവാദിസ്സ, പടിഞ്ഞാ ഇതരസ്സ. സോതവിഞ്ഞാണം രൂപാരമ്മണംയേവാതി യദി ചക്ഖുവിഞ്ഞാണസ്സ അനന്തരാ ഉപ്പജ്ജേയ്യ, വിപാകമനോധാതു വിയ രൂപാരമ്മണം സിയാതി ചോദേതും വുത്തം. ചക്ഖുഞ്ച പടിച്ച രൂപേ ച ഉപ്പജ്ജതി സോതവിഞ്ഞാണന്തി പഞ്ഹേസു സുത്താഭാവേന പടിക്ഖിപിത്വാ അനന്തരുപ്പത്തിം സല്ലക്ഖേന്തോ ലദ്ധിവസേന പടിജാനാതി. തഞ്ഞേവ ചക്ഖുവിഞ്ഞാണം തം സോതവിഞ്ഞാണന്തി യഥാ പഠമജവനാനന്തരം ദുതിയജവനം മനോവിഞ്ഞാണഭാവേന തഞ്ഞേവ ഹോതി, കിം തേ തഥാ ഏതമ്പി ദ്വയം ഏകമേവാതി പുച്ഛതി. ഇമിനാ നയേന സബ്ബവാരേസു അത്ഥോ വേദിതബ്ബോ. നച്ചതി ഗായതീതിആദിവചനം ആരമ്മണസമോധാനേ ലഹുപരിവത്തിതായ വോകിണ്ണഭാവം ദീപേതി, ന അനന്തരപച്ചയതം, തസ്മാ അസാധകന്തി.

അനന്തരപച്ചയകഥാവണ്ണനാ.