൩. സദ്ദോ വിപാകോതികഥാവണ്ണനാ

൬൩൬-൬൩൭. ഇദാനി സദ്ദോ വിപാകോതികഥാ നാമ ഹോതി. തത്ഥ ‘‘സോ തസ്സ കമ്മസ്സ കതത്താ ഉപചിതത്താ ഉസ്സന്നത്താ വിപുലത്താ ബ്രഹ്മസ്സരോ ഹോതീ’’തിആദീനി (ദീ. നി. ൩.൨൩൬) അയോനിസോ ഗഹേത്വാ ‘‘സദ്ദോ വിപാകോ’’തി യേസം ലദ്ധി, സേയ്യഥാപി മഹാസംഘികാനം; തേസം ‘‘കമ്മസമുട്ഠാനാ അരൂപധമ്മാവ വിപാകാതി നാമം ലഭന്തി. രൂപധമ്മേസു പനായം വോഹാരോ നത്ഥീ’’തി ദസ്സേതും പുച്ഛാ സകവാദിസ്സ, പടിഞ്ഞാ ഇതരസ്സ. സുഖവേദനീയോതിആദി ‘‘വിപാകോ നാമ ഏവരൂപോ ഹോതീ’’തി ദസ്സനത്ഥം വുത്തം. ‘‘സോ തസ്സ കമ്മസ്സാ’’തി സുത്തം ലക്ഖണപടിലാഭദസ്സനത്ഥം വുത്തം. മഹാപുരിസോ ഹി കമ്മസ്സ കതത്താ സുചിപരിവാരോപി ഹോതി, ന ച പരിവാരോ വിപാകോ, തസ്മാ അസാധകമേതന്തി.

സദ്ദോ വിപാകോതികഥാവണ്ണനാ.