൧൦. വിഞ്ഞത്തി സീലന്തികഥാവണ്ണനാ

൬൦൧-൬൦൨. ഇദാനി വിഞ്ഞത്തി സീലന്തികഥാ നാമ ഹോതി. തത്ഥ കായവിഞ്ഞത്തി കായകമ്മം, വചീവിഞ്ഞത്തി വചീകമ്മന്തി ഗഹിതത്താ ‘‘വിഞ്ഞത്തി സീല’’ന്തി യേസം ലദ്ധി, സേയ്യഥാപി മഹാസംഘികാനഞ്ചേവ സമ്മിതിയാനഞ്ച; തേ സന്ധായ വിഞ്ഞത്തീതി പുച്ഛാ സകവാദിസ്സ, പടിഞ്ഞാ ഇതരസ്സ. അഥ നം യസ്മാ സീലം നാമ വിരതി, ന രൂപധമ്മോ, തസ്മാ തേനത്ഥേന ചോദേതും പാണാതിപാതാ വേരമണീതിആദിമാഹ. അഭിവാദനം സീലന്തിആദി യഥാരൂപം വിഞ്ഞത്തിം സോ ‘‘സീല’’ന്തി മഞ്ഞതി തം ഉദ്ധരിത്വാ ദസ്സേതും വുത്തം. യസ്മാ പന സാ വിരതി ന ഹോതി, തസ്മാ പുന പാണാതിപാതാതിആദിമാഹ. ലദ്ധി പനസ്സ ഛലേന പതിട്ഠിതത്താ അപ്പതിട്ഠിതായേവാതി.

വിഞ്ഞത്തി സീലന്തികഥാവണ്ണനാ.