൧൦. വോഹാരകഥാവണ്ണനാ

൩൪൭. ഇദാനി വോഹാരകഥാ നാമ ഹോതി. തത്ഥ ബുദ്ധോ ഭഗവാ ലോകുത്തരേന വോഹാരേന വോഹരതീതി യേസം ലദ്ധി, സേയ്യഥാപി ഏതരഹി അന്ധകാനം; തേ സന്ധായ പുച്ഛാ സകവാദിസ്സ, ലദ്ധിവസേന പടിഞ്ഞാ പരവാദിസ്സ. ലോകുത്തരേ സോതേതിആദീനി തസ്സ അയുത്തവാദീഭാവദീപനത്ഥം വുത്താനി. അയഞ്ഹേത്ഥ അധിപ്പായോ – ‘‘സദ്ദായതനമേവ തേ ലോകുത്തരം, ഉദാഹു സോതാദീനിപീ’’തി.

ഹഞ്ചി ബുദ്ധസ്സ ഭഗവതോ വോഹാരോ ലോകിയേ സോതേ പടിഹഞ്ഞതീതി ഏത്ഥ യദി സോ ലോകുത്തരേ പടിഹഞ്ഞേയ്യ. ലോകുത്തരോ സിയാതി ഏവമത്ഥോ ന ഗഹേതബ്ബോ. ലോകിയേ പടിഹഞ്ഞമാനസ്സ പന ലോകുത്തരതാ നാമ നത്ഥീതി അയമേത്ഥാധിപ്പായോ. ലോകിയേന വിഞ്ഞാണേനാതി ഏത്ഥാപി ലോകിയേനേവാതി അത്ഥോ. ഇതരഥാ അനേകന്തതാ സിയാ. ലോകുത്തരഞ്ഹി ലോകിയേനപി ഞാണേന ഞായതീ. ഏവം സബ്ബം യഥാനുരൂപതോ വേദിതബ്ബം. സബ്ബേ തേ മഗ്ഗം ഭാവേന്തീതി പഞ്ഹേസു യേ മഗ്ഗം നപ്പടിലഭന്തി, തേ സന്ധായ പടിക്ഖിപതി. യേ പടിലഭന്തി, തേ സന്ധായ പടിജാനാതി.

൩൫൧. സോവണ്ണമയായാതി സുവണ്ണമയായ. ഇദം പരവാദിസ്സ ഉദാഹരണം.

ഏളണ്ഡിയായാതി ഏളണ്ഡമയായ. ഇദം സകവാദിസ്സ ഉദാഹരണം. ലോകിയം വോഹരന്തസ്സ ലോകിയോതി അയമ്പി ഏകാ ലദ്ധി. സാ ഏതരഹി ഏകച്ചാനം അന്ധകാനം ലദ്ധി. സേസമേത്ഥ ഉത്താനത്ഥമേവാതി.

വോഹാരകഥാവണ്ണനാ.