൧. പരൂപഹാരവണ്ണനാ

൩൦൭. ഇദാനി പരൂപഹാരകഥാ നാമ ഹോതി. തത്ഥ യേ അരഹത്തം പടിജാനന്താനം അപ്പത്തേ പത്തസഞ്ഞീനം അധിമാനികാനം കുഹകാനം വാ അരഹത്തം പടിജാനന്താനം സുക്കവിസ്സട്ഠിം ദിസ്വാ ‘‘മാരകായികാ ദേവതാ അരഹതോ അസുചിം ഉപസംഹരന്തീ’’തി മഞ്ഞന്തി; സേയ്യഥാപി ഏതരഹി പുബ്ബസേലിയാ ച അപരസേലിയാ ച; തേ സന്ധായ അത്ഥി അരഹതോതി പുച്ഛാ സകവാദിസ്സ, പടിഞ്ഞാ ഇതരസ്സ. ഇദാനി യസ്മാ സുക്കവിസ്സട്ഠി നാമ രാഗസമുട്ഠാനാ ഹോതി, തസ്മാ അത്ഥി അരഹതോ രാഗോതി അനുയോഗോ ആരദ്ധോ. സോ സബ്ബോപി ഉത്താനത്ഥോയേവ.

മാരകായികാ ദേവതാ അത്തനോതിആദിപഞ്ഹേ യസ്മാ താസം ദേവതാനം സുക്കവിസ്സട്ഠി നാമ നത്ഥി, അഞ്ഞേസമ്പി സുക്കം ഗഹേത്വാ ന ഉപസംഹരന്തി, അരഹതോ പന സുക്കമേവ നത്ഥി, തസ്മാ ന ഹേവന്തി പടിക്ഖിപതി.

നേവ അത്തനോതിപഞ്ഹേ പന നിമ്മിനിത്വാ ഉപസംഹരന്തീതി ലദ്ധിയാ പടിജാനാതി. ലോമകൂപേഹീതിപഞ്ഹേ സപ്പിതേലാനം വിയ ലോമകൂപേഹി ഉപസംഹരണാഭാവം ദിസ്വാ പടിക്ഖിപതി.

൩൦൮. ഹന്ദ ഹീതി വചസായത്ഥേ നിപാതോ. ‘‘അരഹാ നു ഖോ അഹം, നോ’’തി ഏവം വിമതിം ഗാഹയിസ്സാമാതി ഏവം വചസായം കത്വാ ഉപസംഹരന്തീതി അത്ഥോ. അത്ഥി അരഹതോ വിമതീതി പുട്ഠോ അട്ഠവത്ഥുകം വിചികിച്ഛം സന്ധായ പടിക്ഖിപതി, ദുതിയം പുട്ഠോ ഇത്ഥിപുരിസാനം നാമഗോത്താദീസു സന്നിട്ഠാനാഭാവം സന്ധായ പടിജാനാതി.

൩൦൯. അത്ഥി തസ്സ ആസയോതി തസ്സ സുക്കസ്സ ഉച്ചാരപസ്സാവാനം വിയ പതിട്ഠാനോകാസോ അത്ഥീതി പുച്ഛതി.

൩൧൨. സധമ്മകുസലസ്സാതി അത്തനോ അരഹത്തധമ്മമത്തേയേവ കുസലസ്സ. പഞ്ഞാവിമുത്തം സന്ധായേവം വദതി. പരധമ്മകുസലസ്സാതി സധമ്മതോ പരസ്മിം അട്ഠസമാപത്തിധമ്മേപി കുസലസ്സ. ഉഭതോഭാഗവിമുത്തം സന്ധായേവം വദതി. സേസമേത്ഥ പാളിഅനുസാരേനേവ വേദിതബ്ബന്തി.

പരൂപഹാരകഥാവണ്ണനാ.