൭. സത്തകനിദ്ദേസവണ്ണനാ

൨൦൩. സത്തകേ – സകിം നിമുഗ്ഗോതി ഏകവാരം നിമുഗ്ഗോ. ഏകന്തകാളകേഹീതി ഏകന്തേനേവ കാളകേഹി നത്ഥികവാദഅഹേതുകവാദഅകിരിയവാദസങ്ഖാതേഹി നിയതമിച്ഛാദിട്ഠിധമ്മേഹി. ഏവം പുഗ്ഗലോതി ഇമിനാ കാരണേന പുഗ്ഗലോ ഏകവാരം നിമുഗ്ഗോ തഥാ നിമുഗ്ഗോവ ഹോതി. ഏതസ്സ ഹി പുന ഭവതോ വുട്ഠാനം നാമ നത്ഥീതി വദന്തി. മക്ഖലിഗോസാലാദയോ വിയ ഹേട്ഠാ നരകഗ്ഗീനംയേവ ആഹാരോ ഹോതി.

സാഹു സദ്ധാ കുസലേസു ധമ്മേസൂതി കുസലധമ്മേസു സദ്ധാ നാമ സാധുലദ്ധികാതി ഉമ്മുജ്ജതി. സോ താവതകേനേവ കുസലേന ഉമ്മുജ്ജതി നാമ. സാധു ഹിരീതിആദീസുപി ഏസേവ നയോ. ഹായതിയേവാതി ചങ്കവാരേ ആസിത്തഉദകം വിയ ഏകന്തേന പരിഹായതേവ. ഏവം പുഗ്ഗലോതി ഏവം സാഹു സദ്ധാതി. ഇമേസം സദ്ധാദീനം വസേന ഏകവാരം ഉമ്മുജ്ജിത്വാ തേസം പരിഹാനിയാ പുന നിമുജ്ജതിയേവ, ദേവദത്താദയോ വിയ. ദേവദത്തോ ഹി അട്ഠ സമാപത്തിയോ, പഞ്ച ച അഭിഞ്ഞായോ നിബ്ബത്തേത്വാപി പുന ബുദ്ധാനം പടികണ്ടകതായ തേഹി ഗുണേഹി പരിഹീനോ രുഹിരുപ്പാദകമ്മം സങ്ഘഭേദകമ്മഞ്ച കത്വാ കായസ്സ ഭേദാ ദുതിയചിത്തവാരേന നിരയേ നിബ്ബത്തി. കോകാലികോ ദ്വേ അഗ്ഗസാവകേ ഉപവദിത്വാ പദുമനിരയേ നിബ്ബത്തോ.

നേവ ഹായതി നോ വഡ്ഢതീതി അപ്പഹോനകകാലേപി ന ഹായതി, പഹോനകകാലേപി ന വഡ്ഢതി. ഉഭയമ്പി പനേതം അഗാരികേനപി അനഗാരികേനപി ദീപേതബ്ബം. ഏകച്ചോ ഹി അഗാരികോ അപ്പഹോനകകാലേ പക്ഖികഭത്തം വാ സലാകഭത്തം വാ വസ്സാവാസികം വാ ഉപനിബന്ധാപേതി. സോ പച്ഛാ പഹോനകകാലേപി പക്ഖികഭത്താദിമത്തമേവ പവത്തേതി. അനഗാരികോപി ആദിമ്ഹി അപ്പഹോനകകാലേ ഉദ്ദേസം വാ ധുതങ്ഗം വാ ഗണ്ഹാതി, മേധാബലവീരിയസമ്പത്തിയാ പഹോനകകാലേപി തതോ ഉത്തരിം ന കരോതി. ഏവം പുഗ്ഗലോതി ഏവം ഇമായ സദ്ധാദീനം ഠിതിയാ പുഗ്ഗലോ ഉമ്മുജ്ജിത്വാ ഠിതോ നാമ ഹോതി.

ഉമ്മുജ്ജിത്വാ വിപസ്സതി വിലോകേതീതി സോതാപന്നോ പുഗ്ഗലോ ഉട്ഠഹിത്വാ ഗമനമഗ്ഗം ഗന്തബ്ബം ദിസം വാ ആലോകേതി നാമ.

ഉമ്മുജ്ജിത്വാ പതരതീതി സകദാഗാമിപുഗ്ഗലോ കിലേസതനുതായ ഉട്ഠഹിത്വാ ഗന്തബ്ബദിസാഭിമുഖോ പതരതി നാമ.

പതിഗാധപ്പത്തോ ഹോതീതി അനാഗാമിപുഗ്ഗലോ ഉട്ഠായ വിലോകേത്വാ പതരിത്വാ ഗന്ത്വാ ഏകസ്മിം ഠാനേ പതിട്ഠാപത്തോ നാമ ഹോതി, തിട്ഠതി, ന പുനാഗച്ഛതി.

തിണ്ണോ പാരങ്ഗതോ ഥലേ തിട്ഠതീതി സബ്ബകിലേസോഘം തരിത്വാ പരതീരം ഗന്ത്വാ നിബ്ബാനഥലേ ഠിതോ നാമ ഹോതി. ഇമേ പന സത്ത പുഗ്ഗലാ ഉദകോപമേന ദീപിതാ.

സത്ത കിര ജങ്ഘവാണിജാ അദ്ധാനമഗ്ഗപടിപന്നാ അന്തരാമഗ്ഗേ ഏകം പുണ്ണനദിം പാപുണിംസു. തേസു പഠമം ഓതിണ്ണോ ഉദകഭീരുകോ പുരിസോ ഓതിണ്ണട്ഠാനേയേവ നിമുജ്ജിത്വാ പുന ഉട്ഠാതും നാസക്ഖി, അന്തോയേവ മച്ഛകച്ഛപഭക്ഖോ ജാതോ. ദുതിയോ ഓതിണ്ണട്ഠാനേ നിമുജ്ജിത്വാ സകിം ഉട്ഠഹിത്വാ പുന നിമുഗ്ഗോ ഉട്ഠാതും നാസക്ഖി, അന്തോയേവ മച്ഛകച്ഛപഭക്ഖോ ജാതോ. തതിയോ നിമുജ്ജിത്വാ ഉട്ഠഹി. സോ മജ്ഝേ നദിയാ ഠത്വാ നേവ ഓരതോ ആഗന്തും, ന പരതോ ഗന്തും അസക്ഖി. ചതുത്ഥോ ഉട്ഠായ ഠിതോ ഉത്തരണതിത്ഥം ഓലോകേസി. പഞ്ചമോ ഓതരണതിത്ഥം ഓലോകേത്വാ പതരി. ഛട്ഠോ തരിത്വാ പാരിമതീരം ഗന്ത്വാ കടിപ്പമാണേ ഉദകേ ഠിതോ. സത്തമോ പാരിമതീരം ഗന്ത്വാ ഗന്ധചുണ്ണാദീഹി ന്ഹാത്വാ വരവത്ഥാനി നിവാസേത്വാ സുരഭിവിലേപനം വിലിമ്പിത്വാ നീലുപ്പലാദീനി പിളന്ധിത്വാ നാനാലങ്കാരപടിമണ്ഡിതോ മഹാനഗരം പവിസിത്വാ പാസാദവരമാരുയ്ഹ ഉത്തമഭോജനം ഭുഞ്ജി.

തത്ഥ സത്ത ജങ്ഘവാണിജാ വിയ ഇമേ സത്ത പുഗ്ഗലാ. നദീ വിയ വട്ടം. പഠമസ്സ ഉദകഭീരുകസ്സ പുരിസസ്സ ഓതിണ്ണട്ഠാനേയേവ നിമുജ്ജനം വിയ മിച്ഛാദിട്ഠികസ്സ വട്ടേ നിമുജ്ജനം. ഉമ്മുജ്ജിത്വാ നിമുഗ്ഗപുരിസോ വിയ സദ്ധാദീനം ഉപ്പത്തിമത്തകേന ഉമ്മുജ്ജിത്വാ തേസം പരിഹാനിയാ നിമുഗ്ഗപുഗ്ഗലോ. മജ്ഝേ നദിയാ ഠിതോ വിയ സദ്ധാദീനം ഠിതിയാ ഠിതപുഗ്ഗലോ. ഉത്തരണതിത്ഥം ഓലോകേന്തോ വിയ ഗന്തബ്ബമഗ്ഗം ഗന്തബ്ബദിസം വാ ഓലോകേന്തോ സോതാപന്നോ. പതരിതപുരിസോ വിയ കിലേസതനുതായ പതരന്തോ സകദാഗാമീ. തരിത്വാ കടിമത്തേ ഉദകേ ഠിതപുരിസോ വിയ അനാവത്തിതധമ്മതായ ഠിതോ അനാഗാമീ. ന്ഹത്വാ പാരിമതീരം ഉത്തരിത്വാ ഥലേ ഠിതപുരിസോ വിയ ചത്താരോ ഓഘേ അതിക്കമിത്വാ നിബ്ബാനഥലേ ഠിതോ ഖീണാസവബ്രാഹ്മണോ. ഥലേ ഠിതപുരിസസ്സ നഗരം പവിസിത്വാ പാസാദവരം ആരുയ്ഹ ഉത്തമഭോജനഭുഞ്ജനം വിയ ഖീണാസവസ്സ നിബ്ബാനാരമ്മണം ഫലസമാപത്തിം അപ്പേത്വാ വീതിനാമനം വേദിതബ്ബം. ഉഭതോഭാഗവിമുത്താദയോ ഹേട്ഠാ പകാസിതായേവാതി.

സത്തകനിദ്ദേസവണ്ണനാ.

൨൦൭. അട്ഠകനവകനിദ്ദേസാപി ഹേട്ഠാ വുത്തനയേനേവ വേദിതബ്ബാ.