൮. സപ്പുരിസസുത്തവണ്ണനാ

൩൮. അട്ഠമേ അത്ഥായാതി അത്ഥത്ഥായ. ഹിതായ സുഖായാതി ഹിതത്ഥായ സുഖത്ഥായ. പുബ്ബപേതാനന്തി പരലോകഗതാനം ഞാതീനം. ഇമസ്മിം സുത്തേ അനുപ്പന്നേ ബുദ്ധേ ചക്കവത്തിരാജാനോ ബോധിസത്താ പച്ചേകബുദ്ധാ ലബ്ഭന്തി, ബുദ്ധകാലേ ബുദ്ധാ ചേവ ബുദ്ധസാവകാ ച. യഥാവുത്താനഞ്ഹി ഏതേസം അത്ഥായ ഹിതായ സുഖായ സംവത്തന്തി. ബഹുന്നം വത അത്ഥായ, സപ്പഞ്ഞോ ഘരമാവസന്തി സപ്പഞ്ഞോ ഘരേ വസന്തോ ബഹൂനം വത അത്ഥായ ഹോതി. പുബ്ബേതി പഠമേവ. പുബ്ബേകതമനുസ്സരന്തി മാതാപിതൂനം പുബ്ബകാരഗുണേ അനുസ്സരന്തോ. സഹധമ്മേനാതി സകാരണേന പച്ചയപൂജനേന പൂജേതി. അപചേ ബ്രഹ്മചാരയോതി ബ്രഹ്മചാരിനോ അപചയതി, നീചവുത്തിതം നേസം ആപജ്ജതി. പേസലോതി പിയസീലോ.