൪. ദുതിയഹത്ഥകസുത്തവണ്ണനാ

൨൪. ചതുത്ഥേ പഞ്ചമത്തേഹി ഉപാസകസതേഹീതി സോതാപന്നസകദാഗാമീനംയേവ അരിയസാവകഉപാസകാനം പഞ്ചഹി സതേഹി പരിവുതോ ഭുത്തപാതരാസോ ഗന്ധമാലവിലേപേനചുണ്ണാനി ഗഹേത്വാ യേന ഭഗവാ തേനുപസങ്കമി. സങ്ഗഹവത്ഥൂനീതി സങ്ഗണ്ഹനകാരണാനി. തേഹാഹന്തി തേഹി അഹം. തം ദാനേന സങ്ഗണ്ഹാമീതി നങ്ഗലബലിബദ്ദഭത്തബീജാദീനി ചേവ ഗന്ധമാലമൂലാദീനി ച ദത്വാ സങ്ഗണ്ഹാമി. പേയ്യവജ്ജേനാതി അമ്മ, താത, ഭാതര, ഭഗിനീതിആദികേന കണ്ണസുഖേന മുദുകേന പിയവചനേന സങ്ഗണ്ഹാമി. അത്ഥചരിയായാതി ‘‘ഇമസ്സ ദാനേന വാ പിയവചനേന വാ കിച്ചം നത്ഥി, അത്ഥചരിയായ സങ്ഗണ്ഹിതബ്ബയുത്തകോ അയ’’ന്തി ഞത്വാ ഉപ്പന്നകിച്ചനിത്ഥരണസങ്ഖാതായ അത്ഥചരിയായ സങ്ഗണ്ഹാമി. സമാനത്തതായാതി ‘‘ഇമസ്സ ദാനാദീഹി കിച്ചം നത്ഥി, സമാനത്തതായ സങ്ഗണ്ഹിതബ്ബോ അയ’’ന്തി ഏകതോ ഖാദനപിവനനിസജ്ജാദീഹി അത്തനാ സമാനം കത്വാ സങ്ഗണ്ഹാമി. ദലിദ്ദസ്സ ഖോ നോ തഥാ സോതബ്ബം മഞ്ഞന്തീതി ദലിദ്ദസ്സ കിഞ്ചി ദാതും വാ കാതും വാ അസക്കോന്തസ്സ, യഥാ ദലിദ്ദസ്സ നോ തഥാ സോതബ്ബം മഞ്ഞന്തി, മമ പന സോതബ്ബം മഞ്ഞന്തി, ദിന്നോവാദേ തിട്ഠന്തി, ന മേ അനുസാസനിം അതിക്കമിതബ്ബം മഞ്ഞന്തി. യോനി ഖോ ത്യായന്തി ഉപായോ ഖോ തേ അയം. ഇമേസു പന ദ്വീസുപി സുത്തേസു സത്ഥാരാ സീലചാഗപഞ്ഞാ മിസ്സകാ കഥിതാതി വേദിതബ്ബാ.