൫. പഠമലോകധമ്മസുത്തവണ്ണനാ

൫. പഞ്ചമേ ലോകസ്സ ധമ്മാതി ലോകധമ്മാ. ഏതേഹി മുത്താ നാമ നത്ഥി, ബുദ്ധാനമ്പി ഹോന്തി. തേനേവാഹ – ലോകം അനുപരിവത്തന്തീതി അനുബന്ധന്തി നപ്പജഹന്തി, ലോകതോ ന നിവത്തന്തീതി അത്ഥോ. ലോകോ ച അട്ഠ ലോകധമ്മേ അനുപരിവത്തതീതി അയഞ്ച ലോകോ ഏതേ അനുബന്ധതി ന പജഹതി, തേഹി ധമ്മേഹി ന നിവത്തതീതി അത്ഥോ.

ലാഭോ അലാഭോതി ലാഭേ ആഗതേ അലാഭോ ആഗതോയേവാതി വേദിതബ്ബോ. അയസാദീസുപി ഏസേവ നയോ. അവേക്ഖതി വിപരിണാമധമ്മേതി ‘‘വിപരിണാമധമ്മാ ഇമേ’’തി ഏവം അവേക്ഖതി. വിധൂപിതാതി വിധമിതാ വിദ്ധംസിതാ. പദഞ്ച ഞത്വാതി നിബ്ബാനപദം ജാനിത്വാ. സമ്മപ്പജാനാതി ഭവസ്സ പാരഗൂതി ഭവസ്സ പാരം ഗതോ നിപ്ഫത്തിം മത്ഥകം പത്തോ, നിബ്ബാനപദം ഞത്വാവ തം പാരം ഗതഭാവം സമ്മപ്പജാനാതീതി. ഇമസ്മിം സുത്തേ വട്ടവിവട്ടം കഥിതം.