൫. പാരിച്ഛത്തകസുത്തവണ്ണനാ

൬൯. പഞ്ചമേ പന്നപലാസോതി പതിതപലാസോ. ജാലകജാതോതി സഞ്ജാതപത്തപുപ്ഫജാലോ. തസ്സ ഹി പത്തജാലഞ്ച പുപ്ഫജാലഞ്ച സഹേവ നിക്ഖമതി. ഖാരകജാതോതി പാടിയേക്കം സഞ്ജാതേന സുവിഭത്തേന പത്തജാലകേന ച പുപ്ഫജാലകേന ച സമന്നാഗതോ. കുടുമലകജാതോതി സഞ്ജാതമകുളോ. കോരകജാതോതി അവികസിതേഹി മഹാകുച്ഛീഹി സമ്ഭിന്നമുഖേഹി പുപ്ഫേഹി സമന്നാഗതോ. സബ്ബപാലിഫുല്ലോതി സബ്ബാകാരേന സുപുപ്ഫിതോ. ദിബ്ബേ ചത്താരോ മാസേതി ദിബ്ബേന ആയുനാ ചത്താരോ മാസേ. മനുസ്സഗണനായ പന താനി ദ്വാദസ വസ്സസഹസ്സാനി ഹോന്തി. പരിചാരേന്തീതി ഇതോ ചിതോ ച ഇന്ദ്രിയാനി ചാരേന്തി, കീളന്തി രമന്തീതി അത്ഥോ.

ആഭായ ഫുടം ഹോതീതി തത്തകം ഠാനം ഓഭാസേന ഫുടം ഹോതി. തേസഞ്ഹി പുപ്ഫാനം ബാലസൂരിയസ്സ വിയ ആഭാ ഹോതി, പത്താനി പണ്ണച്ഛത്തപ്പമാണാനി, അന്തോ മഹാതുമ്ബമത്താ രേണു ഹോതി. പുപ്ഫിതേ പന പാരിച്ഛത്തകേ ആരോഹനകിച്ചം വാ അങ്കുസകം ഗഹേത്വാ നമനകിച്ചം വാ പുപ്ഫാഹരണത്ഥം ചങ്ഗോടകകിച്ചം വാ നത്ഥി, കന്തനകവാതോ ഉട്ഠഹിത്വാ പുപ്ഫാനി വണ്ടതോ കന്തതി, സമ്പടിച്ഛനകവാതോ സമ്പടിച്ഛതി, പവേസനകവാതോ സുധമ്മം ദേവസഭം പവേസേതി, സമ്മജ്ജനകവാതോ പുരാണപുപ്ഫാനി നീഹരതി, സന്ഥരണകവാതോ പത്തകണ്ണികകേസരാനി രഞ്ജേന്തോ സന്ഥരതി. മജ്ഝട്ഠാനേ ധമ്മാസനം ഹോതി യോജനപ്പമാണോ രതനപല്ലങ്കോ ഉപരി തിയോജനേന സേതച്ഛത്തേന ധാരിയമാനേന, തദനന്തരം സക്കസ്സ ദേവരഞ്ഞോ ആസനം അത്ഥരിയതി, തതോ തേത്തിംസായ ദേവപുത്താനം, തതോ അഞ്ഞേസം മഹേസക്ഖാനം ദേവാനം, അഞ്ഞതരദേവതാനം പുപ്ഫകണ്ണികാവ ആസനം ഹോതി. ദേവാ ദേവസഭം പവിസിത്വാ നിസീദന്തി. തതോ പുപ്ഫേഹി രേണുവട്ടി ഉഗ്ഗന്ത്വാ ഉപരികണ്ണികം ആഹച്ച നിപതമാനാ ദേവതാനം തിഗാവുതപ്പമാണം അത്തഭാവം ലാഖാരസപരികമ്മസജ്ജിതം വിയ സുവണ്ണചുണ്ണപിഞ്ജരം വിയ കരോതി. ഏകച്ചേ ദേവാ ഏകേകം പുപ്ഫം ഗഹേത്വാ അഞ്ഞമഞ്ഞം പഹരന്താപി കീളന്തിയേവ. പഹരണകാലേപി മഹാതുമ്ബപ്പമാണാ രേണു നിക്ഖമിത്വാ സരീരം പഭാസമ്പന്നേഹി ഗന്ധചുണ്ണേഹി സഞ്ജതമനോസിലാരാഗം വിയ കരോതി. ഏവം സാ കീളാ ചതൂഹി മാസേഹി പരിയോസാനം ഗച്ഛതി. അയമാനുഭാവോതി അയം അനുഫരിതും ആനുഭാവോ.

ഇദാനി യസ്മാ ന സത്ഥാ പാരിച്ഛത്തകേന അത്ഥികോ, തേന പന സദ്ധിം ഉപമേത്വാ സത്ത അരിയസാവകേ ദസ്സേതുകാമോ, തസ്മാ തേ ദസ്സേതും ഏവമേവ ഖോതിആദിമാഹ. തത്ഥ പബ്ബജ്ജായ ചേതേതീതി പബ്ബജിസ്സാമീതി ചിന്തേതി. ദേവാനംവാതി ദേവാനം വിയ. യാവ ബ്രഹ്മലോകാ സദ്ദോ അബ്ഭുഗ്ഗച്ഛതീതി പഥവിതലതോ യാവ ബ്രഹ്മലോകാ സാധുകാരസദ്ദേന സബ്ബം ഏകസദ്ദമേവ ഹോതി. അയമാനുഭാവോതി അയം ഖീണാസവസ്സ ഭിക്ഖുനോ അനുഫരണാനുഭാവോ. ഇമസ്മിം സുത്തേ ചതുപാരിസുദ്ധിസീലം പബ്ബജ്ജാനിസ്സിതം ഹോതി, കസിണപരികമ്മം പഠമജ്ഝാനസന്നിസ്സിതം, വിപസ്സനായ സദ്ധിം തയോ മഗ്ഗാ തീണി ച ഫലാനി അരഹത്തമഗ്ഗസന്നിസ്സിതാനി ഹോന്തി. ദേസനായ ഹേട്ഠതോ വാ ഉപരിതോ വാ ഉഭയതോ വാ പരിച്ഛേദോ ഹോതി, ഇധ പന ഉഭയതോ പരിച്ഛേദോ. തേനേതം വുത്തം. സങ്ഖേപതോ പനേത്ഥ വട്ടവിവട്ടം കഥിതന്തി വേദിതബ്ബം.