൪. ദേവതാവഗ്ഗോ

൫. പഠമമിത്തസുത്തവണ്ണനാ

൩൬. ചതുത്ഥസ്സ പഞ്ചമേ ദുദ്ദദന്തി ദുപ്പരിച്ചജം മഹാരഹം ഭണ്ഡകം. ദുക്കരം കരോതീതി കാതും അസുകരം കമ്മം കരോതി. ദുക്ഖമം ഖമതീതി സഹായസ്സ അത്ഥായ ദുരധിവാസം അധിവാസേതി. ഗുയ്ഹമസ്സ ആവികരോതീതി അത്തനോ ഗുയ്ഹം തസ്സ ആവികരോതി. ഗുയ്ഹമസ്സ പരിഗുഹതീതി തസ്സ ഗുയ്ഹം അഞ്ഞേസം നാചിക്ഖതി. ഖീണേന നാതിമഞ്ഞതീതി തസ്സ ഭോഗേ ഖീണേ തേന ഖയേന തം നാതിമഞ്ഞതി, തസ്മിം ഓമാനം അത്തനി ച അതിമാനം ന കരോതി.

൬. ദുതിയമിത്തസുത്തവണ്ണനാ

൩൭. ഛട്ഠേ വത്താതി വചനകുസലോ. വചനക്ഖമോതി വചനം ഖമതി, ദിന്നം ഓവാദം കരോതി. ഗമ്ഭീരന്തി ഗുയ്ഹം രഹസ്സം ഝാനനിസ്സിതം വിപസ്സനാമഗ്ഗഫലനിബ്ബാനനിസ്സിതം.

൭. പഠമപടിസമ്ഭിദാസുത്തവണ്ണനാ

൩൮. സത്തമേ ഇദം മേ ചേതസോ ലീനത്തന്തി ഉപ്പന്നേ ചേതസോ ലീനത്തേ ‘‘ഇദം മേ ചേതസോ ലീനത്ത’’ന്തി യഥാസഭാവതോ ജാനാതി. അജ്ഝത്തം സംഖിത്തം നാമ ഥിനമിദ്ധാനുഗതം. ബഹിദ്ധാ വിക്ഖിത്തം നാമ പഞ്ചസു കാമഗുണേസു വിക്ഖിത്തം. വേദനാതിആദീനി പപഞ്ചമൂലവസേന ഗഹിതാനി. വേദനാ ഹി തണ്ഹായ മൂലം സുഖവസേന തണ്ഹുപ്പത്തിതോ, സഞ്ഞാ ദിട്ഠിയാ മൂലം അവിഭൂതാരമ്മണേ ദിട്ഠിഉപ്പത്തിതോ, വിതക്കോ മാനസ്സ മൂലം വിതക്കവസേന അസ്മീതി മാനുപ്പത്തിതോ. സപ്പായാസപ്പായേസൂതി ഉപകാരാനുപകാരേസു. നിമിത്തന്തി കാരണം. സേസം സബ്ബത്ഥ ഉത്താനത്ഥമേവാതി.

ദേവതാവഗ്ഗോ ചതുത്ഥോ.