൩. ഛളഭിജാതിസുത്തവണ്ണനാ

൫൭. തതിയേ ഛളഭിജാതിയോതി ഛ ജാതിയോ. തത്രിദന്തി തത്രായം. ലുദ്ദാതി ദാരുണാ. ഭിക്ഖൂ കണ്ടകവുത്തികാതി സമണാ നാമേതേ. ഏകസാടകാതി ഏകേനേവ പിലോതികഖണ്ഡേന പുരതോ പടിച്ഛാദനകാ. അകാമകസ്സ ബിലം ഓലഗ്ഗേയ്യുന്തി സത്ഥേ ഗച്ഛമാനേ ഗോണമ്ഹി മതേ ഗോമംസമൂലം ഉപ്പാദനത്ഥായ വിഭജിത്വാ ഖാദമാനാ ഏകസ്സ ഗോമംസം അനിച്ഛന്തസ്സേവ കോട്ഠാസം കത്വാ ‘‘അയഞ്ച തേ ഖാദിതബ്ബോ, മൂലഞ്ച ദാതബ്ബ’’ന്തി തം കോട്ഠാസസങ്ഖാതം ബിലം ഓലഗ്ഗേയ്യും, ബലക്കാരേന ഹത്ഥേ ഠപേയ്യുന്തി അത്ഥോ. അഖേത്തഞ്ഞുനാതി അഭിജാതിപഞ്ഞത്തിയാ ഖേത്തം അജാനന്തേന. തം സുണാഹീതി തം മമ പഞ്ഞത്തിം സുണാഹി. കണ്ഹാഭിജാതികോതി കാളകജാതികോ. കണ്ഹം ധമ്മം അഭിജായതീതി കണ്ഹസഭാവോ ഹുത്വാ ജായതി നിബ്ബത്തതി, കണ്ഹാഭിജാതിയം വാ ജായതി. നിബ്ബാനം അഭിജായതീതി നിബ്ബാനം പാപുണാതി, അരിയഭൂമിസങ്ഖാതായ വാ നിബ്ബാനജാതിയാ ജായതി.