൪. മഹാമോഗ്ഗല്ലാനസുത്തവണ്ണനാ

൩൪. ചതുത്ഥേ തിസ്സോ നാമ ഭിക്ഖൂതി ഥേരസ്സേവ സദ്ധിവിഹാരികോ. മഹിദ്ധികോ മഹാനുഭാവോതി ഇജ്ഝനട്ഠേന മഹതീ ഇദ്ധി അസ്സാതി മഹിദ്ധികോ. അനുഫരണട്ഠേന മഹാ ആനുഭാവോ അസ്സാതി മഹാനുഭാവോ. ചിരസ്സം ഖോ, മാരിസ മോഗ്ഗല്ലാന, ഇമം പരിയായമകാസീതി ഏവരൂപം ലോകേ പകതിയാ പിയസമുദാഹാരവചനം ഹോതി. ലോകിയാ ഹി ചിരസ്സം ആഗതമ്പി അനാഗതപുബ്ബമ്പി മനാപജാതിയം ആഗതം ദിസ്വാ ‘‘കുതോ ഭവം ആഗതോ, ചിരസ്സം ഭവം ആഗതോ, കഥം തേ ഇധാഗമനമഗ്ഗോ ഞാതോ, കിം മഗ്ഗമൂള്ഹോസീ’’തിആദീനി വദന്തി. അയം പന ആഗതപുബ്ബത്തായേവ ഏവമാഹ. ഥേരോ ഹി കാലേന കാലം ബ്രഹ്മലോകം ഗച്ഛതിയേവ. തത്ഥ പരിയായമകാസീതി വാരം അകാസി. യദിദം ഇധാഗമനായാതി യോ അയം ഇധാഗമനായ വാരോ, തം ചിരസ്സം അകാസീതി വുത്തം ഹോതി. ഇദമാസനം പഞ്ഞത്തന്തി മഹാരഹം ബ്രഹ്മപല്ലങ്കം പഞ്ഞാപേത്വാ ഏവമാഹ. അവേച്ചപ്പസാദേനാതി അധിഗതേന അചലേന മഗ്ഗപ്പസാദേന. ഇമസ്മിം സുത്തേ സോതാപത്തിമഗ്ഗഞാണം കഥിതം.