൪. സീഹസേനാപതിസുത്തവണ്ണനാ

൩൪. ചതുത്ഥേ സന്ദിട്ഠികന്തി സാമം പസ്സിതബ്ബകം. ദായകോതി ദാനസൂരോ. ന സോ സദ്ധാമത്തകേനേവ തിട്ഠതി, പരിച്ചജിതുമ്പി സക്കോതീതി അത്ഥോ. ദാനപതീതി യം ദാനം ദേതി, തസ്സ പതി ഹുത്വാ ദേതി, ന ദാസോ, ന സഹായോ. യോ ഹി അത്തനാ മധുരം ഭുഞ്ജതി, പരേസം അമധുരം ദേതി, സോ ദാനസങ്ഖാതസ്സ ദേയ്യധമ്മസ്സ ദാസോ ഹുത്വാ ദേതി. യോ യം അത്തനാ ഭുഞ്ജതി, തദേവ ദേതി, സോ സഹായോ ഹുത്വാ ദേതി. യോ പന അത്തനാ യേന കേനചി യാപേതി, പരേസം മധുരം ദേതി, സോ പതി ജേട്ഠകോ സാമീ ഹുത്വാ ദേതി. താദിസം സന്ധായ വുത്തം – ‘‘ദാനപതീ’’തി.

അമങ്കുഭൂതോതി ന നിത്തേജഭൂതോ. വിസാരദോതി ഞാണസോമനസ്സപ്പത്തോ. സഹബ്യതം ഗതാതി സഹഭാവം ഏകീഭാവം ഗതാ. കതാവകാസാതി യേന കമ്മേന തത്ഥ അവകാസോ ഹോതി, തസ്സ കതത്താ കതാവകാസാ. തം പന യസ്മാ കുസലമേവ ഹോതി, തസ്മാ കതകുസലാതി വുത്തം. മോദരേതി മോദന്തി പമോദന്തി. അസിതസ്സാതി അനിസ്സിതസ്സ തഥാഗതസ്സ. താദിനോതി താദിലക്ഖണം പത്തസ്സ.