൧. ചക്കസുത്തവണ്ണനാ

൩൧. ചതുത്ഥസ്സ പഠമേ ചക്കാനീതി സമ്പത്തിയോ. ചതുചക്കം വത്തതീതി ചത്താരി സമ്പത്തിചക്കാനി വത്തന്തി ഘടിയന്തിയേവാതി അത്ഥോ. പതിരൂപദേസവാസോതി യത്ഥ ചതസ്സോ പരിസാ സന്ദിസ്സന്തി, ഏവരൂപേ അനുച്ഛവികേ ദേസേ വാസോ. സപ്പുരിസാവസ്സയോതി ബുദ്ധാദീനം സപ്പുരിസാനം അവസ്സയനം സേവനം ഭജനം, ന രാജാനം. അത്തസമ്മാപണിധീതി അത്തനോ സമ്മാ ഠപനം, സചേ പുബ്ബേ അസ്സദ്ധാദീഹി സമന്നാഗതോ ഹോതി, താനി പഹായ സദ്ധാദീസു പതിട്ഠാപനം. പുബ്ബേ ച കതപുഞ്ഞതാതി പുബ്ബേ ഉപചിതകുസലതാ. ഇദമേവ ചേത്ഥ പമാണം. യേന ഹി ഞാണസമ്പയുത്തചിത്തേന കുസലകമ്മം കതം ഹോതി, തദേവ കുസലം തം പുരിസം പതിരൂപദേസേ ഉപനേതി, സപ്പുരിസേ ഭജാപേതി, സോ ഏവ ച പുഗ്ഗലോ അത്താനം സമ്മാ ഠപേതി. പുഞ്ഞകതോതി കതപുഞ്ഞോ. സുഖഞ്ചേതംധിവത്തതീതി സുഖഞ്ച ഏതം പുഗ്ഗലം അധിവത്തതി, അവത്ഥരതീതി അത്ഥോ.