൧൦. പരിബ്ബാജകസുത്തവണ്ണനാ

൩൦. ദസമേ അഭിഞ്ഞാതാതി ഞാതാ പാകടാ. അന്നഭാരോതിആദീനി തേസം നാമാനി. പടിസല്ലാനാ വുട്ഠിതോതി ഫലസമാപത്തിതോ വുട്ഠിതോ. സാ ഹി ഇധ പടിസല്ലാനന്തി അധിപ്പേതാ. പച്ചക്ഖായാതി പടിക്ഖിപിത്വാ. അഭിജ്ഝാലുന്തി സതണ്ഹം. കാമേസു തിബ്ബസാരാഗന്തി വത്ഥുകാമേസു ബഹലരാഗം. തമഹം തത്ഥ ഏവം വദേയ്യന്തി തം അഹം തസ്മിം കാരണേ ഏവം വദേയ്യം. പടിക്കോസിതബ്ബം മഞ്ഞേയ്യാതി പടിക്കോസിതബ്ബാനി പടിബാഹിതബ്ബനി വാ മഞ്ഞേയ്യ. സഹധമ്മികാതി സകാരണാ. വാദാനുപാതാതി ധമ്മികവാദേ ഘട്ടയമാനാ അധമ്മികവാദാനുപാതാ, വാദപ്പവത്തിയോതി അത്ഥോ. ഗാരയ്ഹാ ഠാനാതി ഗരഹിതബ്ബയുത്തകാ പച്ചയാ. ആഗച്ഛന്തീതി ഉപഗച്ഛന്തി.

ഉക്കലാതി ഉക്കലജനപദവാസിനോ. വസ്സഭഞ്ഞാതി വസ്സോ ച ഭഞ്ഞോ ചാതി ദ്വേ ജനാ. അഹേതുകവാദാതി ‘‘നത്ഥി ഹേതു നത്ഥി പച്ചയോ സത്താനം വിസുദ്ധിയാ’’തിഏവമാദിവാദിനോ. അകിരിയവാദാതി ‘‘കരോതോ ന കരീയതി പാപ’’ന്തി ഏവം കിരിയപടിക്ഖേപവാദിനോ. നത്ഥികവാദാതി ‘‘നത്ഥി ദിന്ന’’ന്തിആദിവാദിനോ. തേ ഇമേസു തീസുപി ദസ്സനേസു ഓക്കന്തനിയാമാ അഹേസും. കഥം പന തേസു നിയാമോ ഹോതീതി? യോ ഹി ഏവരൂപം ലദ്ധിം ഗഹേത്വാ രത്തിട്ഠാനദിവാട്ഠാനേസു നിസിന്നോ സജ്ഝായതി വീമംസതി, തസ്സ ‘‘നത്ഥി ഹേതു നത്ഥി പച്ചയോ കരോതോ ന കരീയതി പാപം…പേ… നത്ഥി ദിന്നം…പേ… കായസ്സ ഭേദാ ഉച്ഛിജ്ജതീ’’തി തസ്മിം ആരമ്മണേ മിച്ഛാസതി സന്തിട്ഠതി, ചിത്തം ഏകഗ്ഗം ഹോതി, ജവനാനി ജവന്തി. പഠമജവനേ സതേകിച്ഛോ ഹോതി, തഥാ ദുതിയാദീസു, സത്തമേ ബുദ്ധാനമ്പി അതേകിച്ഛോ അനിവത്തി അരിട്ഠകണ്ടകസദിസോ ഹോതി. തത്ഥ കോചി ഏകം ദസ്സനം ഓക്കമതി, കോചി ദ്വേ, കോചി തീണിപി. നിയതമിച്ഛാദിട്ഠികോവ ഹോതി, പത്തോ സഗ്ഗമഗ്ഗാവരണഞ്ചേവ മോക്ഖമഗ്ഗാവരണഞ്ച, അഭബ്ബോ തസ്സ അത്തഭാവസ്സ അനന്തരം സഗ്ഗമ്പി ഗന്തും, പഗേവ മോക്ഖം. വട്ടഖാണുകോ നാമേസ സത്തോ പഥവിഗോപകോ, യേഭുയ്യേന ഏവരൂപസ്സ ഭവതോ വുട്ഠാനം നത്ഥി. വസ്സഭഞ്ഞാപി ഏദിസാ അഹേസും. നിന്ദാബ്യാരോസനഉപാരമ്ഭഭയാതി അത്തനോ നിന്ദഭയേന ഘട്ടനഭയേന ഉപവാദഭയേന ചാതി അത്ഥോ. അഭിജ്ഝാവിനയേ സിക്ഖന്തി അഭിജ്ഝാവിനയോ വുച്ചതി അരഹത്തം, അരഹത്തേ സിക്ഖമാനോ അപ്പമത്തോ നാമ വുച്ചതീതി സുത്തന്തേ വട്ടവിട്ടം കഥേത്വാ ഗാഥായ ഫലസമാപത്തി കഥിതാതി.

ഉരുവേലവഗ്ഗോ തതിയോ.