൨. പവിവേകസുത്തവണ്ണനാ

൯൪. ദുതിയേ ചീവരപവിവേകന്തി ചീവരം നിസ്സായ ഉപ്പജ്ജനകകിലേസേഹി വിവിത്തഭാവം. സേസദ്വയേപി ഏസേവ നയോ. സാണാനീതി സാണവാകചേലാനി. മസാണാനീതി മിസ്സകചേലാനി. ഛവദുസ്സാനീതി മതസരീരതോ ഛഡ്ഡിതവത്ഥാനി, ഏരകതിണാദീനി വാ ഗന്ഥേത്വാ കതനിവാസനാനി. പംസുകൂലാനീതി പഥവിയം ഛഡ്ഡിതനന്തകാനി. തിരീടാനീതി രുക്ഖതചവത്ഥാനി. അജിനാനീതി അജിനമിഗചമ്മാനി. അജിനക്ഖിപന്തി തദേവ മജ്ഝേ ഫാലിതം, സഹഖുരകന്തിപി വദന്തി. കുസചീരന്തി കുസതിണാനി ഗന്ഥേത്വാ കതചീരം. വാകചീരഫലകചീരേസുപി ഏസേവ നയോ. കേസകമ്ബലന്തി മനുസ്സകേസേഹി കതകമ്ബലം. വാലകമ്ബലന്തി അസ്സവാലാദീഹി കതകമ്ബലം. ഉലൂകപക്ഖികന്തി ഉലൂകപത്താനി ഗന്ഥേത്വാ കതനിവാസനം.

സാകഭക്ഖാതി അല്ലസാകഭക്ഖാ. സാമാകഭക്ഖാതി സാമാകതണ്ഡുലഭക്ഖാ. നീവാരാദീസു നീവാരാ നാമ അരഞ്ഞേ സയം ജാതവീഹിജാതി. ദദ്ദുലന്തി ചമ്മകാരേഹി ചമ്മം ലിഖിത്വാ ഛഡ്ഡിതകസടം. ഹടം വുച്ചതി സിലേസോപി സേവാലോപി കണികാരാദിരുക്ഖനിയ്യാസോപി. കണന്തി കുണ്ഡകം. ആചാമോതി ഭത്തഉക്ഖലികായ ലഗ്ഗോ ഝാമഓദനോ. തം ഛഡ്ഡിതട്ഠാനേ ഗഹേത്വാ ഖാദന്തി, ഓദനകഞ്ജിയന്തിപി വദന്തി. പിഞ്ഞാകാദയോ പാകടാവ. പവത്തഫലഭോജീതി പതിതഫലഭോജീ. ഭുസാഗാരന്തി ഖലസാലം.

സീലവാതി ചതുപാരിസുദ്ധിസീലേന സമന്നാഗതോ. ദുസ്സീല്യഞ്ചസ്സ പഹീനം ഹോതീതി പഞ്ച ദുസ്സീല്യാനി പഹീനാനി ഹോന്തി. സമ്മാദിട്ഠികോതി യാഥാവദിട്ഠികോ. മിച്ഛാദിട്ഠീതി അയാഥാവദിട്ഠി. ആസവാതി ചത്താരോ ആസവാ. അഗ്ഗപ്പത്തോതി സീലഗ്ഗപ്പത്തോ. സാരപ്പത്തോതി സീലസാരം പത്തോ. സുദ്ധോതി പരിസുദ്ധോ. സാരേ പതിട്ഠിതോതി സീലസമാധിപഞ്ഞാസാരേ പതിട്ഠിതോ.

സേയ്യഥാപീതി യഥാ നാമ. സമ്പന്നന്തി പരിപുണ്ണം പരിപക്കസാലിഭരിതം. സങ്ഘരാപേയ്യാതി സങ്കഡ്ഢാപേയ്യ. ഉബ്ബഹാപേയ്യാതി ഖലട്ഠാനം ആഹരാപേയ്യ. ഭുസികന്തി ഭുസം. കോട്ടാപേയ്യാതി ഉദുക്ഖലേ പക്ഖിപാപേത്വാ മുസലേഹി പഹരാപേയ്യ. അഗ്ഗപ്പത്താനീതി തണ്ഡുലഗ്ഗം പത്താനി. സാരപ്പത്താദീസുപി ഏസേവ നയോ. സേസം ഉത്താനമേവ. യം പനേത്ഥ ‘‘ദുസ്സീല്യഞ്ചസ്സ പഹീനം മിച്ഛാദിട്ഠി ചസ്സ പഹീനാ’’തി വുത്തം, തം സോതാപത്തിമഗ്ഗേന പഹീനഭാവം സന്ധായ വുത്തന്തി വേദിതബ്ബം.