(൧൦) ൫. ബാലവഗ്ഗവണ്ണനാ

൯൯. പഞ്ചമസ്സ പഠമേ അനാഗതം ഭാരം വഹതീതി ‘‘സമ്മജ്ജനീ പദീപോ ച, ഉദകം ആസനേന ച, ഛന്ദപാരിസുദ്ധിഉതുക്ഖാനം, ഭിക്ഖുഗണനാ ച ഓവാദോ, പാതിമോക്ഖം ഥേരഭാരോതി വുച്ചതീ’’തി ഇമം ദസവിധം ഥേരഭാരം നവകോ ഹുത്വാ ഥേരേന അനജ്ഝിട്ഠോ കരോന്തോ അനാഗതം ഭാരം വഹതി നാമ. ആഗതം ഭാരം ന വഹതീതി ഥേരോ സമാനോ തമേവ ദസവിധം ഭാരം അത്തനാ വാ അകരോന്തോ പരം വാ അസമാദപേന്തോ ആഗതം ഭാരം ന വഹതി നാമ. ദുതിയസുത്തേപി ഇമിനാവ നയേന അത്ഥോ വേദിതബ്ബോ.

൧൦൧. തതിയേ അകപ്പിയേ കപ്പിയസഞ്ഞീതി അകപ്പിയേ സീഹമംസാദിമ്ഹി ‘‘കപ്പിയം ഇദ’’ന്തി ഏവംസഞ്ഞീ. കപ്പിയേ അകപ്പിയസഞ്ഞീതി കുമ്ഭീലമംസബിളാരമംസാദിമ്ഹി കപ്പിയേ ‘‘അകപ്പിയം ഇദ’’ന്തി ഏവംസഞ്ഞീ. ചതുത്ഥം വുത്തനയേനേവ വേദിതബ്ബം.

൧൦൩. പഞ്ചമേ അനാപത്തിയാ ആപത്തിസഞ്ഞീതി ആപുച്ഛിത്വാ ഭണ്ഡകം ധോവന്തസ്സ, പത്തം പചന്തസ്സ, കേസേ ഛിന്ദന്തസ്സ, ഗാമം പവിസന്തസ്സാതിആദീസു അനാപത്തി, തത്ഥ ‘‘ആപത്തി അയ’’ന്തി ഏവംസഞ്ഞീ. ആപത്തിയാ അനാപത്തിസഞ്ഞീതി തേസഞ്ഞേവ വത്ഥൂനം അനാപുച്ഛാകരണേ ആപത്തി, തത്ഥ ‘‘അനാപത്തീ’’തി ഏവംസഞ്ഞീ. ഛട്ഠേപി വുത്തനയേനേവ അത്ഥോ വേദിതബ്ബോ. സത്തമാദീനി ഉത്താനത്ഥാനേവ.

൧൦൯. ഏകാദസമേ ആസവാതി കിലേസാ. ന കുക്കുച്ചായിതബ്ബന്തി സങ്ഘഭോഗസ്സ അപട്ഠപനം അവിചാരണം ന കുക്കുച്ചായിതബ്ബം നാമ, തം കുക്കുച്ചായതി. കുക്കുച്ചായിതബ്ബന്തി തസ്സേവ പട്ഠപനം വിചാരണം, തം ന കുക്കുച്ചായതി. ദ്വാദസമാദീനി ഹേട്ഠാ വുത്തനയേനേവ വേദിതബ്ബാനീതി.

ബാലവഗ്ഗോ പഞ്ചമോ.