൭-൮. സഞ്ചേതനികസുത്തദ്വയവണ്ണനാ

൨൧൭-൨൧൮. സത്തമേ സഞ്ചേതനികാനന്തി ചേതേത്വാ പകപ്പേത്വാ കതാനം. ഉപചിതാനന്തി ചിതാനം വഡ്ഢിതാനം. അപ്പടിസംവേദിത്വാതി തേസം കമ്മാനം വിപാകം അവേദിയിത്വാ. ബ്യന്തീഭാവന്തി വിഗതന്തഭാവം തേസം കമ്മാനം പരിച്ഛേദപരിവടുമതാകരണം. തഞ്ച ഖോ ദിട്ഠേവ ധമ്മേതി തഞ്ച ഖോ വിപാകം ദിട്ഠധമ്മവേദനീയം ദിട്ഠേവ ധമ്മേ. ഉപപജ്ജന്തി ഉപപജ്ജവേദനീയം അനന്തരേ അത്തഭാവേ. അപരേ വാ പരിയായേതി അപരപരിയായവേദനീയം പന സംസാരപ്പവത്തേ സതി സഹസ്സിമേപി അത്തഭാവേതി. ഇമിനാ ഇദം ദസ്സേതി ‘‘സംസാരപ്പവത്തേ പടിലദ്ധവിപാകാരഹകമ്മേ ന വിജ്ജതി സോ ജഗതിപ്പദേസോ, യത്ഥ ഠിതോ മുച്ചേയ്യ പാപകമ്മാ’’തി. തിവിധാതി തിപ്പകാരാ. കായകമ്മന്തസന്ദോസബ്യാപത്തീതി കായകമ്മന്തസങ്ഖാതാ വിപത്തി. ഇമിനാ നയേന സബ്ബപദാനി വേദിതബ്ബാനി. അട്ഠമേ അപണ്ണകോ മണീതി സമന്തതോ ചതുരസ്സോ പാസകോ.