(൫) നിരോധവാരോ

൬൯. (ക) യസ്സ ചിത്തം നിരുജ്ഝതി തസ്സ ചിത്തം നിരുജ്ഝിത്ഥാതി? ആമന്താ.

(ഖ) യസ്സ വാ പന ചിത്തം നിരുജ്ഝിത്ഥ തസ്സ ചിത്തം നിരുജ്ഝതീതി?

ചിത്തസ്സ ഉപ്പാദക്ഖണേ നിരോധസമാപന്നാനം അസഞ്ഞസത്താനം തേസം ചിത്തം നിരുജ്ഝിത്ഥ, നോ ച തേസം ചിത്തം നിരുജ്ഝതി. ചിത്തസ്സ ഭങ്ഗക്ഖണേ തേസം ചിത്തം നിരുജ്ഝിത്ഥ ചേവ നിരുജ്ഝതി ച.

(ക) യസ്സ ചിത്തം ന നിരുജ്ഝതി തസ്സ ചിത്തം ന നിരുജ്ഝിത്ഥാതി? നിരുജ്ഝിത്ഥ.

(ഖ) യസ്സ വാ പന ചിത്തം ന നിരുജ്ഝിത്ഥ തസ്സ ചിത്തം ന നിരുജ്ഝതീതി? നത്ഥി.

൭൦. (ക) യസ്സ ചിത്തം നിരുജ്ഝതി തസ്സ ചിത്തം നിരുജ്ഝിസ്സതീതി?

പച്ഛിമചിത്തസ്സ ഭങ്ഗക്ഖണേ തേസം ചിത്തം നിരുജ്ഝതി, നോ ച തേസം ചിത്തം നിരുജ്ഝിസ്സതി. ഇതരേസം ചിത്തസ്സ ഭങ്ഗക്ഖണേ തേസം ചിത്തം നിരുജ്ഝതി ചേവ നിരുജ്ഝിസ്സതി ച.

(ഖ) യസ്സ വാ പന ചിത്തം നിരുജ്ഝിസ്സതി തസ്സ ചിത്തം നിരുജ്ഝതീതി?

ചിത്തസ്സ ഉപ്പാദക്ഖണേ നിരോധസമാപന്നാനം അസഞ്ഞസത്താനം തേസം ചിത്തം നിരുജ്ഝിസ്സതി, നോ ച തേസം ചിത്തം നിരുജ്ഝതി. ചിത്തസ്സ ഭങ്ഗക്ഖണേ തേസം ചിത്തം നിരുജ്ഝിസ്സതി ചേവ നിരുജ്ഝതി ച.

(ക) യസ്സ ചിത്തം ന നിരുജ്ഝതി തസ്സ ചിത്തം ന നിരുജ്ഝിസ്സതീതി? നിരുജ്ഝിസ്സതി.

(ഖ) യസ്സ വാ പന ചിത്തം ന നിരുജ്ഝിസ്സതി തസ്സ ചിത്തം ന നിരുജ്ഝതീതി? നിരുജ്ഝതി.

൭൧. (ക) യസ്സ ചിത്തം നിരുജ്ഝിത്ഥ തസ്സ ചിത്തം നിരുജ്ഝിസ്സതീതി?

പച്ഛിമചിത്തസ്സ ഭങ്ഗക്ഖണേ തേസം ചിത്തം നിരുജ്ഝിത്ഥ, നോ ച തേസം ചിത്തം നിരുജ്ഝിസ്സതി. ഇതരേസം തേസം ചിത്തം നിരുജ്ഝിത്ഥ ചേവ നിരുജ്ഝിസ്സതി ച.

(ഖ) യസ്സ വാ പന ചിത്തം നിരുജ്ഝിസ്സതി തസ്സ ചിത്തം നിരുജ്ഝിത്ഥാതി? ആമന്താ.

(ക) യസ്സ ചിത്തം ന നിരുജ്ഝിത്ഥ തസ്സ ചിത്തം ന നിരുജ്ഝിസ്സതീതി? നത്ഥി.

(ഖ) യസ്സ വാ പന ചിത്തം ന നിരുജ്ഝിസ്സതി തസ്സ ചിത്തം ന നിരുജ്ഝിത്ഥാതി? നിരുജ്ഝിത്ഥ.