(൬) ഉപ്പാദനിരോധവാരോ

൭൨. (ക) യസ്സ ചിത്തം ഉപ്പജ്ജതി തസ്സ ചിത്തം നിരുജ്ഝിത്ഥാതി? ആമന്താ.

(ഖ) യസ്സ വാ പന ചിത്തം നിരുജ്ഝിത്ഥ തസ്സ ചിത്തം ഉപ്പജ്ജതീതി?

ചിത്തസ്സ ഭങ്ഗക്ഖണേ നിരോധസമാപന്നാനം അസഞ്ഞസത്താനം തേസം ചിത്തം നിരുജ്ഝിത്ഥ, നോ ച തേസം ചിത്തം ഉപ്പജ്ജതി. ചിത്തസ്സ ഉപ്പാദക്ഖണേ തേസം ചിത്തം നിരുജ്ഝിത്ഥ ചേവ ഉപ്പജ്ജതി ച.

(ക) യസ്സ ചിത്തം ന ഉപ്പജ്ജതി തസ്സ ചിത്തം ന നിരുജ്ഝിത്ഥാതി? നിരുജ്ഝിത്ഥ.

(ഖ) യസ്സ വാ പന ചിത്തം ന നിരുജ്ഝിത്ഥ തസ്സ ചിത്തം ന ഉപ്പജ്ജതീതി? നത്ഥി.

൭൩. (ക) യസ്സ ചിത്തം ഉപ്പജ്ജതി തസ്സ ചിത്തം നിരുജ്ഝിസ്സതീതി? ആമന്താ.

(ഖ) യസ്സ വാ പന ചിത്തം നിരുജ്ഝിസ്സതി തസ്സ ചിത്തം ഉപ്പജ്ജതീതി?

ചിത്തസ്സ ഭങ്ഗക്ഖണേ നിരോധസമാപന്നാനം അസഞ്ഞസത്താനം തേസം ചിത്തം നിരുജ്ഝിസ്സതി, നോ ച തേസം ചിത്തം ഉപ്പജ്ജതി. ചിത്തസ്സ ഉപ്പാദക്ഖണേ തേസം ചിത്തം നിരുജ്ഝിസ്സതി ചേവ ഉപ്പജ്ജതി ച.

(ക) യസ്സ ചിത്തം ന ഉപ്പജ്ജതി തസ്സ ചിത്തം ന നിരുജ്ഝിസ്സതീതി?

ചിത്തസ്സ ഭങ്ഗക്ഖണേ നിരോധസമാപന്നാനം അസഞ്ഞസത്താനം തേസം ചിത്തം ന ഉപ്പജ്ജതി, നോ ച തേസം ചിത്തം ന നിരുജ്ഝിസ്സതി. പച്ഛിമചിത്തസ്സ ഭങ്ഗക്ഖണേ തേസം ചിത്തം ന ചേവ ഉപ്പജ്ജതി ന ച നിരുജ്ഝിസ്സതി.

(ഖ) യസ്സ വാ പന ചിത്തം ന നിരുജ്ഝിസ്സതി തസ്സ ചിത്തം ന ഉപ്പജ്ജതീതി? ആമന്താ.

൭൪. (ക) യസ്സ ചിത്തം ഉപ്പജ്ജിത്ഥ തസ്സ ചിത്തം നിരുജ്ഝിസ്സതീതി?

പച്ഛിമചിത്തസ്സ ഭങ്ഗക്ഖണേ തേസം ചിത്തം ഉപ്പജ്ജിത്ഥ, നോ ച തേസം ചിത്തം നിരുജ്ഝിസ്സതി. ഇതരേസം തേസം ചിത്തം ഉപ്പജ്ജിത്ഥ ചേവ നിരുജ്ഝിസ്സതി ച.

(ഖ) യസ്സ വാ പന ചിത്തം നിരുജ്ഝിസ്സതി തസ്സ ചിത്തം ഉപ്പജ്ജിത്ഥാതി? ആമന്താ.

(ക) യസ്സ ചിത്തം ന ഉപ്പജ്ജിത്ഥ തസ്സ ചിത്തം ന നിരുജ്ഝിസ്സതീതി? നത്ഥി.

(ഖ) യസ്സ വാ പന ചിത്തം ന നിരുജ്ഝിസ്സതി തസ്സ ചിത്തം ന ഉപ്പജ്ജിത്ഥാതി? ഉപ്പജ്ജിത്ഥ.