(൨) മൂലമൂലനയോ

൫൩. (ക) യേ കേചി കുസലാ ധമ്മാ, സബ്ബേ തേ കുസലമൂലമൂലാതി? തീണേവ കുസലമൂലമൂലാനി. അവസേസാ കുസലാ ധമ്മാ ന കുസലമൂലമൂലാ.

(ഖ) യേ വാ പന കുസലമൂലമൂലാ, സബ്ബേ തേ ധമ്മാ കുസലാതി? ആമന്താ.

൫൪. (ക) യേ കേചി കുസലാ ധമ്മാ, സബ്ബേ തേ കുസലമൂലേന ഏകമൂലമൂലാതി? ആമന്താ.

(ഖ) യേ വാ പന കുസലമൂലേന ഏകമൂലമൂലാ, സബ്ബേ തേ ധമ്മാ കുസലാതി?

കുസലസമുട്ഠാനം രൂപം കുസലമൂലേന ഏകമൂലമൂലം, ന കുസലം. കുസലം കുസലമൂലേന ഏകമൂലമൂലഞ്ചേവ കുസലഞ്ച.

൫൫. (ക) യേ കേചി കുസലമൂലേന ഏകമൂലമൂലാ ധമ്മാ, സബ്ബേ തേ കുസലമൂലേന അഞ്ഞമഞ്ഞമൂലമൂലാതി?

മൂലാനി യാനി ഏകതോ ഉപ്പജ്ജന്തി കുസലമൂലാനി ഏകമൂലമൂലാനി ചേവ അഞ്ഞമഞ്ഞമൂലമൂലാനി ച. അവസേസാ കുസലമൂലസഹജാതാ ധമ്മാ കുസലമൂലേന ഏകമൂലമൂലാ, ന ച അഞ്ഞമഞ്ഞമൂലമൂലാ.

(ഖ) യേ വാ പന കുസലമൂലേന അഞ്ഞമഞ്ഞമൂലമൂലാ, സബ്ബേ തേ ധമ്മാ കുസലാതി? ആമന്താ.