(൩) മൂലകനയോ

൫൬. (ക) യേ കേചി കുസലാ ധമ്മാ, സബ്ബേ തേ കുസലമൂലകാതി? ആമന്താ.

(ഖ) യേ വാ പന കുസലമൂലകാ, സബ്ബേ തേ ധമ്മാ കുസലാതി?

കുസലസമുട്ഠാനം രൂപം കുസലമൂലകം ന കുസലം. കുസലം കുസലമൂലകഞ്ചേവ കുസലഞ്ച.

൫൭. (ക) യേ കേചി കുസലാ ധമ്മാ, സബ്ബേ തേ കുസലമൂലേന ഏകമൂലകാതി? ആമന്താ.

(ഖ) യേ വാ പന കുസലമൂലേന ഏകമൂലകാ, സബ്ബേ തേ ധമ്മാ കുസലാതി?

കുസലസമുട്ഠാനം രൂപം കുസലമൂലേന ഏകമൂലകം, ന കുസലം. കുസലം കുസലമൂലേന ഏകമൂലകഞ്ചേവ കുസലഞ്ച.

൫൮. (ക) യേ കേചി കുസലമൂലേന ഏകമൂലകാ ധമ്മാ, സബ്ബേ തേ കുസലമൂലേന അഞ്ഞമഞ്ഞമൂലകാതി?

മൂലാനി യാനി ഏകതോ ഉപ്പജ്ജന്തി കുസലമൂലാനി ഏകമൂലകാനി ചേവ അഞ്ഞമഞ്ഞമൂലകാനി ച. അവസേസാ കുസലമൂലസഹജാതാ ധമ്മാ കുസലമൂലേന ഏകമൂലകാ, ന ച അഞ്ഞമഞ്ഞമൂലകാ.

(ഖ) യേ വാ പന കുസലമൂലേന അഞ്ഞമഞ്ഞമൂലകാ, സബ്ബേ തേ ധമ്മാ കുസലാതി? ആമന്താ.