൯. ദിട്ഠസുതാദിദസ്സനവാരോ

൧൦൩൬. പഞ്ചന്നം ഖന്ധാനം കതി ദിട്ഠാ, കതി സുതാ, കതി മുതാ, കതി വിഞ്ഞാതാ, കതി ന ദിട്ഠാ ന സുതാ ന മുതാ ന വിഞ്ഞാതാ…പേ… സത്തന്നം ചിത്താനം കതി ദിട്ഠാ, കതി സുതാ, കതി മുതാ, കതി വിഞ്ഞാതാ, കതി ന ദിട്ഠാ ന സുതാ ന മുതാ ന വിഞ്ഞാതാ?

൧൦൩൭. രൂപക്ഖന്ധോ സിയാ ദിട്ഠോ, സിയാ സുതോ, സിയാ മുതോ, സിയാ വിഞ്ഞാതോ, സിയാ ന ദിട്ഠോ ന സുതോ ന മുതോ, വിഞ്ഞാതോ. ചത്താരോ ഖന്ധാ ന ദിട്ഠാ ന സുതാ ന മുതാ, വിഞ്ഞാതാ.

രൂപായതനം ദിട്ഠം, ന സുതം ന മുതം, വിഞ്ഞാതം. സദ്ദായതനം ന ദിട്ഠം, സുതം, ന മുതം, വിഞ്ഞാതം. ഗന്ധായതനം… രസായതനം… ഫോട്ഠബ്ബായതനം ന ദിട്ഠം ന സുതം, മുതം, വിഞ്ഞാതം. സത്തായതനാ ന ദിട്ഠാ ന സുതാ ന മുതാ, വിഞ്ഞാതാ.

രൂപധാതു ദിട്ഠാ, ന സുതാ ന മുതാ, വിഞ്ഞാതാ. സദ്ദധാതു ന ദിട്ഠാ, സുതാ, ന മുതാ, വിഞ്ഞാതാ. ഗന്ധധാതു… രസധാതു… ഫോട്ഠബ്ബധാതു ന ദിട്ഠാ ന സുതാ, മുതാ, വിഞ്ഞാതാ. തേരസ ധാതുയോ ന ദിട്ഠാ ന സുതാ ന മുതാ, വിഞ്ഞാതാ.

തീണി സച്ചാനി ന ദിട്ഠാ ന സുതാ ന മുതാ, വിഞ്ഞാതാ. ദുക്ഖസച്ചം സിയാ ദിട്ഠം, സിയാ സുതം, സിയാ മുതം, സിയാ വിഞ്ഞാതം, സിയാ ന ദിട്ഠം ന സുതം ന മുതം, വിഞ്ഞാതം.

ബാവീസതിന്ദ്രിയാ ന ദിട്ഠാ ന സുതാ ന മുതാ, വിഞ്ഞാതാ. നവ ഹേതൂ ന ദിട്ഠാ ന സുതാ ന മുതാ, വിഞ്ഞാതാ. ചത്താരോ ആഹാരാ ന ദിട്ഠാ ന സുതാ ന മുതാ, വിഞ്ഞാതാ. സത്ത ഫസ്സാ ന ദിട്ഠാ ന സുതാ ന മുതാ, വിഞ്ഞാതാ. സത്ത വേദനാ… സത്ത സഞ്ഞാ… സത്ത ചേതനാ… സത്ത ചിത്താ ന ദിട്ഠാ ന സുതാ ന മുതാ, വിഞ്ഞാതാ.