൧൦. തികാദിദസ്സനവാരോ

൧. കുസലത്തികം

൧൦൩൮. പഞ്ചന്നം ഖന്ധാനം കതി കുസലാ, കതി അകുസലാ, കതി അബ്യാകതാ…പേ… സത്തന്നം ചിത്താനം കതി കുസലാ, കതി അകുസലാ, കതി അബ്യാകതാ?

രൂപക്ഖന്ധോ അബ്യാകതോ. ചത്താരോ ഖന്ധാ സിയാ കുസലാ, സിയാ അകുസലാ, സിയാ അബ്യാകതാ. ദസായതനാ അബ്യാകതാ. ദ്വായതനാ സിയാ കുസലാ, സിയാ അകുസലാ, സിയാ അബ്യാകതാ. സോളസ ധാതുയോ അബ്യാകതാ. ദ്വേ ധാതുയോ സിയാ കുസലാ, സിയാ അകുസലാ, സിയാ അബ്യാകതാ. സമുദയസച്ചം അകുസലം. മഗ്ഗസച്ചം കുസലം. നിരോധസച്ചം അബ്യാകതം. ദുക്ഖസച്ചം സിയാ കുസലം, സിയാ അകുസലം, സിയാ അബ്യാകതം.

ദസിന്ദ്രിയാ അബ്യാകതാ. ദോമനസ്സിന്ദ്രിയം അകുസലം. അനഞ്ഞാതഞ്ഞസ്സാമീതിന്ദ്രിയം കുസലം. ചത്താരിന്ദ്രിയാ സിയാ കുസലാ, സിയാ അബ്യാകതാ. ഛ ഇന്ദ്രിയാ സിയാ കുസലാ, സിയാ അകുസലാ, സിയാ അബ്യാകതാ.

തയോ കുസലഹേതൂ കുസലാ. തയോ അകുസലഹേതൂ അകുസലാ. തയോ അബ്യാകതഹേതൂ അബ്യാകതാ. കബളീകാരോ ആഹാരോ അബ്യാകതോ. തയോ ആഹാരാ സിയാ കുസലാ, സിയാ അകുസലാ, സിയാ അബ്യാകതാ. ഛ ഫസ്സാ അബ്യാകതാ. മനോവിഞ്ഞാണധാതുസമ്ഫസ്സോ സിയാ കുസലോ, സിയാ അകുസലോ, സിയാ അബ്യാകതോ. ഛ വേദനാ… ഛ സഞ്ഞാ… ഛ ചേതനാ… ഛ ചിത്താ അബ്യാകതാ. മനോവിഞ്ഞാണധാതു സിയാ കുസലാ, സിയാ അകുസലാ, സിയാ അബ്യാകതാ.

൨. വേദനാതികം

൧൦൩൯. പഞ്ചന്നം ഖന്ധാനം കതി സുഖായ വേദനായ സമ്പയുത്താ, കതി ദുക്ഖായ വേദനായ സമ്പയുത്താ, കതി അദുക്ഖമസുഖായ വേദനായ സമ്പയുത്താ…പേ… സത്തന്നം ചിത്താനം കതി സുഖായ വേദനായ സമ്പയുത്താ, കതി ദുക്ഖായ വേദനായ സമ്പയുത്താ, കതി അദുക്ഖമസുഖായ വേദനായ സമ്പയുത്താ?

ദ്വേ ഖന്ധാ ന വത്തബ്ബാ സുഖായ വേദനായ സമ്പയുത്താതിപി, ദുക്ഖായ വേദനായ സമ്പയുത്താതിപി, അദുക്ഖമസുഖായ വേദനായ സമ്പയുത്താതിപി. തയോ ഖന്ധാ സിയാ സുഖായ വേദനായ സമ്പയുത്താ, സിയാ ദുക്ഖായ വേദനായ സമ്പയുത്താ, സിയാ അദുക്ഖമസുഖായ വേദനായ സമ്പയുത്താ.

ദസായതനാ ന വത്തബ്ബാ സുഖായ വേദനായ സമ്പയുത്താതിപി, ദുക്ഖായ വേദനായ സമ്പയുത്താതിപി, അദുക്ഖമസുഖായ വേദനായ സമ്പയുത്താതിപി. മനായതനം സിയാ സുഖായ വേദനായ സമ്പയുത്തം, സിയാ ദുക്ഖായ വേദനായ സമ്പയുത്തം, സിയാ അദുക്ഖമസുഖായ വേദനായ സമ്പയുത്തം. ധമ്മായതനം സിയാ സുഖായ വേദനായ സമ്പയുത്തം, സിയാ ദുക്ഖായ വേദനായ സമ്പയുത്തം, സിയാ അദുക്ഖമസുഖായ വേദനായ സമ്പയുത്തം, സിയാ ന വത്തബ്ബം സുഖായ വേദനായ സമ്പയുത്തന്തിപി, ദുക്ഖായ വേദനായ സമ്പയുത്തന്തിപി, അദുക്ഖമസുഖായ വേദനായ സമ്പയുത്തന്തിപി.

ദസ ധാതുയോ ന വത്തബ്ബാ സുഖായ വേദനായ സമ്പയുത്താതിപി, ദുക്ഖായ വേദനായ സമ്പയുത്താതിപി, അദുക്ഖമസുഖായ വേദനായ സമ്പയുത്താതിപി. പഞ്ച ധാതുയോ അദുക്ഖമസുഖായ വേദനായ സമ്പയുത്താ, കായവിഞ്ഞാണധാതു സിയാ സുഖായ വേദനായ സമ്പയുത്താ, സിയാ ദുക്ഖായ വേദനായ സമ്പയുത്താ. മനോവിഞ്ഞാണധാതു സിയാ സുഖായ വേദനായ സമ്പയുത്താ, സിയാ ദുക്ഖായ വേദനായ സമ്പയുത്താ, സിയാ അദുക്ഖമസുഖായ വേദനായ സമ്പയുത്താ. ധമ്മധാതു സിയാ സുഖായ വേദനായ സമ്പയുത്താ, സിയാ ദുക്ഖായ വേദനായ സമ്പയുത്താ, സിയാ അദുക്ഖമസുഖായ വേദനായ സമ്പയുത്താ, സിയാ ന വത്തബ്ബാ സുഖായ വേദനായ സമ്പയുത്താതിപി, ദുക്ഖായ വേദനായ സമ്പയുത്താതിപി, അദുക്ഖമസുഖായ വേദനായ സമ്പയുത്താതിപി.

ദ്വേ സച്ചാ സിയാ സുഖായ വേദനായ സമ്പയുത്താ, സിയാ അദുക്ഖമസുഖായ വേദനായ സമ്പയുത്താ. നിരോധസച്ചം ന വത്തബ്ബം സുഖായ വേദനായ സമ്പയുത്തന്തിപി, ദുക്ഖായ വേദനായ സമ്പയുത്തന്തിപി, അദുക്ഖമസുഖായ വേദനായ സമ്പയുത്തന്തിപി. ദുക്ഖസച്ചം സിയാ സുഖായ വേദനായ സമ്പയുത്തം, സിയാ ദുക്ഖായ വേദനായ സമ്പയുത്തം, സിയാ അദുക്ഖമസുഖായ വേദനായ സമ്പയുത്തം, സിയാ ന വത്തബ്ബം സുഖായ വേദനായ സമ്പയുത്തന്തിപി, ദുക്ഖായ വേദനായ സമ്പയുത്തന്തിപി, അദുക്ഖമസുഖായ വേദനായ സമ്പയുത്തന്തിപി.

ദ്വാദസിന്ദ്രിയാ ന വത്തബ്ബാ സുഖായ വേദനായ സമ്പയുത്താതിപി, ദുക്ഖായ വേദനായ സമ്പയുത്താതിപി, അദുക്ഖമസുഖായ വേദനായ സമ്പയുത്താതിപി. ഛ ഇന്ദ്രിയാ സിയാ സുഖായ വേദനായ സമ്പയുത്താ, സിയാ അദുക്ഖമസുഖായ വേദനായ സമ്പയുത്താ. തീണിന്ദ്രിയാ സിയാ സുഖായ വേദനായ സമ്പയുത്താ, സിയാ ദുക്ഖായ വേദനായ സമ്പയുത്താ, സിയാ അദുക്ഖമസുഖായ വേദനായ സമ്പയുത്താ. ജീവിതിന്ദ്രിയം സിയാ സുഖായ വേദനായ സമ്പയുത്തം, സിയാ ദുക്ഖായ വേദനായ സമ്പയുത്തം, സിയാ അദുക്ഖമസുഖായ വേദനായ സമ്പയുത്തം, സിയാ ന വത്തബ്ബം സുഖായ വേദനായ സമ്പയുത്തന്തിപി, ദുക്ഖായ വേദനായ സമ്പയുത്തന്തിപി, അദുക്ഖമസുഖായ വേദനായ സമ്പയുത്തന്തിപി.

ദോസോ അകുസലഹേതു ദുക്ഖായ വേദനായ സമ്പയുത്തോ. സത്ത ഹേതൂ സിയാ സുഖായ വേദനായ സമ്പയുത്താ, സിയാ അദുക്ഖമസുഖായ വേദനായ സമ്പയുത്താ. മോഹോ അകുസലഹേതു സിയാ സുഖായ വേദനായ സമ്പയുത്തോ, സിയാ ദുക്ഖായ വേദനായ സമ്പയുത്തോ, സിയാ ദുക്ഖമസുഖായ വേദനായ സമ്പയുത്തോ.

കബളീകാരോ ആഹാരോ ന വത്തബ്ബോ സുഖായ വേദനായ സമ്പയുത്തോതി പി, ദുക്ഖായ വേദനായ സമ്പയുത്തോതിപി, അദുക്ഖമസുഖായ വേദനായ സമ്പയുത്തോതിപി. തയോ ആഹാരാ സിയാ സുഖായ വേദനായ സമ്പയുത്താ, സിയാ ദുക്ഖായ വേദനായ സമ്പയുത്താ, സിയാ അദുക്ഖമസുഖായ വേദനായ സമ്പയുത്താ.

പഞ്ച ഫസ്സാ അദുക്ഖമസുഖായ വേദനായ സമ്പയുത്താ. കായവിഞ്ഞാണധാതുസമ്ഫസ്സോ സിയാ സുഖായ വേദനായ സമ്പയുത്തോ, സിയാ ദുക്ഖായ വേദനായ സമ്പയുത്തോ. മനോവിഞ്ഞാണധാതുസമ്ഫസ്സോ സിയാ സുഖായ വേദനായ സമ്പയുത്തോ, സിയാ ദുക്ഖായ വേദനായ സമ്പയുത്തോ, സിയാ അദുക്ഖമസുഖായ വേദനായ സമ്പയുത്തോ.

സത്ത വേദനാ ന വത്തബ്ബാ സുഖായ വേദനായ സമ്പയുത്താതിപി, ദുക്ഖായ വേദനായ സമ്പയുത്താതിപി, അദുക്ഖമസുഖായ വേദനായ സമ്പയുത്താതിപി. പഞ്ച സഞ്ഞാ… പഞ്ച ചേതനാ… പഞ്ച ചിത്താ അദുക്ഖമസുഖായ വേദനായ സമ്പയുത്താ, കായവിഞ്ഞാണധാതു സിയാ സുഖായ വേദനായ സമ്പയുത്താ, സിയാ ദുക്ഖായ വേദനായ സമ്പയുത്താ. മനോവിഞ്ഞാണധാതു സിയാ സുഖായ വേദനായ സമ്പയുത്താ, സിയാ ദുക്ഖായ വേദനായ സമ്പയുത്താ, സിയാ അദുക്ഖമസുഖായ വേദനായ സമ്പയുത്താ.

൩. വിപാകത്തികം

൧൦൪൦. പഞ്ചന്നം ഖന്ധാനം കതി വിപാകാ, കതി വിപാകധമ്മധമ്മാ, കതി നേവവിപാകനവിപാകധമ്മധമ്മാ…പേ… സത്തന്നം ചിത്താനം കതി വിപാകാ, കതി വിപാകധമ്മധമ്മാ, കതി നേവവിപാകനവിപാകധമ്മധമ്മാ?

രൂപക്ഖന്ധോ നേവവിപാകനവിപാകധമ്മധമ്മോ. ചത്താരോ ഖന്ധാ സിയാ വിപാകാ, സിയാ വിപാകധമ്മധമ്മാ, സിയാ നേവവിപാകനവിപാകധമ്മധമ്മാ.

ദസായതനാ നേവവിപാകനവിപാകധമ്മധമ്മാ. ദ്വായതനാ സിയാ വിപാകാ, സിയാ വിപാകധമ്മധമ്മാ, സിയാ നേവവിപാകനവിപാകധമ്മധമ്മാ.

ദസ ധാതുയോ നേവവിപാകനവിപാകധമ്മധമ്മാ. പഞ്ച ധാതുയോ വിപാകാ. മനോധാതു സിയാ വിപാകാ, സിയാ നേവവിപാകനവിപാകധമ്മധമ്മാ. ദ്വേ ധാതുയോ സിയാ വിപാകാ സിയാ വിപാകധമ്മധമ്മാ, സിയാ നേവവിപാകനവിപാകധമ്മധമ്മാ.

ദ്വേ സച്ചാ വിപാകധമ്മധമ്മാ. നിരോധസച്ചം നേവവിപാകനവിപാകധമ്മധമ്മം. ദുക്ഖസച്ചം സിയാ വിപാകം, സിയാ വിപാകധമ്മധമ്മം, സിയാ നേവവിപാകനവിപാകധമ്മധമ്മം.

സത്തിന്ദ്രിയാ നേവവിപാകനവിപാകധമ്മധമ്മാ. തീണിന്ദ്രിയാ വിപാകാ. ദ്വിന്ദ്രിയാ വിപാകധമ്മധമ്മാ. അഞ്ഞിന്ദ്രിയം സിയാ വിപാകം, സിയാ വിപാകധമ്മധമ്മം. നവിന്ദ്രിയാ സിയാ വിപാകാ, സിയാ വിപാകധമ്മധമ്മാ, സിയാ നേവവിപാകനവിപാകധമ്മധമ്മാ.

ഛ ഹേതൂ വിപാകധമ്മധമ്മാ. തയോ അബ്യാകതഹേതൂ സിയാ വിപാകാ, സിയാ നേവവിപാകനവിപാകധമ്മധമ്മാ.

കബളീകാരോ ആഹാരോ നേവവിപാകനവിപാകധമ്മധമ്മോ. തയോ ആഹാരാ സിയാ വിപാകാ, സിയാ വിപാകധമ്മധമ്മാ, സിയാ നേവവിപാകനവിപാകധമ്മധമ്മാ. പഞ്ച ഫസ്സാ വിപാകാ. മനോധാതുസമ്ഫസ്സോ സിയാ വിപാകോ, സിയാ നേവവിപാകനവിപാകധമ്മധമ്മോ. മനോവിഞ്ഞാണധാതുസമ്ഫസ്സോ സിയാ വിപാകോ, സിയാ വിപാകധമ്മധമ്മോ, സിയാ നേവവിപാകനവിപാകധമ്മധമ്മോ. പഞ്ച വേദനാ… പഞ്ച സഞ്ഞാ… പഞ്ച ചേതനാ… പഞ്ച ചിത്താ വിപാകാ. മനോധാതു സിയാ വിപാകാ, സിയാ നേവവിപാകനവിപാകധമ്മധമ്മാ. മനോവിഞ്ഞാണധാതു സിയാ വിപാകാ, സിയാ വിപാകധമ്മധമ്മാ, സിയാ നേവവിപാകനവിപാകധമ്മധമ്മാ.

൪. ഉപാദിന്നത്തികം

൧൦൪൧. പഞ്ചന്നം ഖന്ധാനം കതി ഉപാദിന്നുപാദാനിയാ, കതി അനുപാദിന്നുപാദാനിയാ, കതി അനുപാദിന്നഅനുപാദാനിയാ…പേ… സത്തന്നം ചിത്താനം കതി ഉപാദിന്നുപാദാനിയാ, കതി അനുപാദിന്നുപാദാനിയാ, കതി അനുപാദിന്നഅനുപാദാനിയാ?

രൂപക്ഖന്ധോ സിയാ ഉപാദിന്നുപാദാനിയോ, സിയാ അനുപാദിന്നുപാദാനിയോ ൪. ചത്താരോ ഖന്ധാ സിയാ ഉപാദിന്നുപാദാനിയാ, സിയാ അനുപാദിന്നുപാദാനിയാ, സിയാ അനുപാദിന്നഅനുപാദാനിയാ.

പഞ്ചായതനാ ഉപാദിന്നുപാദാനിയാ. സദ്ദായതനം അനുപാദിന്നുപാദാനിയം. ചത്താരോ ആയതനാ സിയാ ഉപാദിന്നുപാദാനിയാ, സിയാ അനുപാദിന്നുപാദാനിയാ. ദ്വായതനാ സിയാ ഉപാദിന്നുപാദാനിയാ, സിയാ അനുപാദിന്നുപാദാനിയാ, സിയാ അനുപാദിന്നഅനുപാദാനിയാ.

ദസ ധാതുയോ ഉപാദിന്നുപാദാനിയാ. സദ്ദധാതു അനുപാദിന്നുപാദാനിയാ. പഞ്ച ധാതുയോ സിയാ ഉപാദിന്നുപാദാനിയാ, സിയാ അനുപാദിന്നുപാദാനിയാ. ദ്വേ ധാതുയോ സിയാ ഉപാദിന്നുപാദാനിയാ, സിയാ അനുപാദിന്നുപാദാനിയാ, സിയാ അനുപാദിന്നഅനുപാദാനിയാ.

സമുദയസച്ചം അനുപാദിന്നുപാദാനിയം. ദ്വേ സച്ചാ അനുപാദിന്നഅനുപാദാനിയാ. ദുക്ഖസച്ചം സിയാ ഉപാദിന്നുപാദാനിയം, സിയാ അനുപാദിന്നുപാദാനിയം.

നവിന്ദ്രിയാ ഉപാദിന്നുപാദാനിയാ. ദോമനസ്സിന്ദ്രിയം അനുപാദിന്നുപാദാനിയം. തീണിന്ദ്രിയാ അനുപാദിന്നഅനുപാദാനിയാ. നവിന്ദ്രിയാ സിയാ ഉപാദിന്നുപാദാനിയാ, സിയാ അനുപാദിന്നുപാദാനിയാ, സിയാ അനുപാദിന്നഅനുപാദാനിയാ. തയോ അകുസലഹേതൂ അനുപാദിന്നുപാദാനിയാ. തയോ കുസലഹേതൂ സിയാ അനുപാദിന്നുപാദാനിയാ, സിയാ അനുപാദിന്നഅനുപാദാനിയാ. തയോ അബ്യാകതഹേതൂ സിയാ ഉപാദിന്നുപാദാനിയാ, സിയാ അനുപാദിന്നുപാദാനിയാ, സിയാ അനുപാദിന്നഅനുപാദാനിയാ.

കബളീകാരോ ആഹാരോ സിയാ ഉപാദിന്നുപാദാനിയോ, സിയാ അനുപാദിന്നുപാദാനിയോ. തയോ ആഹാരാ സിയാ ഉപാദിന്നുപാദാനിയാ, സിയാ അനുപാദിന്നുപാദാനിയാ, സിയാ അനുപാദിന്നഅനുപാദാനിയാ.

പഞ്ച ഫസ്സാ ഉപാദിന്നുപാദാനിയാ. മനോധാതുസമ്ഫസ്സോ സിയാ ഉപാദിന്നുപാദാനിയോ, സിയാ അനുപാദിന്നുപാദാനിയോ. മനോവിഞ്ഞാണധാതുസമ്ഫസ്സോ സിയാ ഉപാദിന്നുപാദാനിയോ, സിയാ അനുപാദിന്നുപാദാനിയോ, സിയാ അനുപാദിന്നഅനുപാദാനിയോ. പഞ്ച വേദനാ… പഞ്ച സഞ്ഞാ… പഞ്ച ചേതനാ… പഞ്ച ചിത്താ ഉപാദിന്നുപാദാനിയാ. മനോധാതു സിയാ ഉപാദിന്നുപാദാനിയാ, സിയാ അനുപാദിന്നുപാദാനിയാ. മനോവിഞ്ഞാണധാതു സിയാ ഉപാദിന്നുപാദാനിയാ, സിയാ അനുപാദിന്നുപാദാനിയാ, സിയാ അനുപാദിന്നഅനുപാദാനിയാ.

൫. വിതക്കത്തികം

൧൦൪൨. പഞ്ചന്നം ഖന്ധാനം കതി സവിതക്കസവിചാരാ, കതി അവിതക്കവിചാരമത്താ, കതി അവിതക്കഅവിചാരാ…പേ… സത്തന്നം ചിത്താനം കതി സവിതക്കസവിചാരാ, കതി അവിതക്കവിചാരമത്താ, കതി അവിതക്കഅവിചാരാ?

രൂപക്ഖന്ധോ അവിതക്കഅവിചാരോ. തയോ ഖന്ധാ സിയാ സവിതക്കസവിചാരാ, സിയാ അവിതക്കവിചാരമത്താ, സിയാ അവിതക്കഅവിചാരാ. സങ്ഖാരക്ഖന്ധോ സിയാ സവിതക്കസവിചാരോ, സിയാ അവിതക്കവിചാരമത്തോ, സിയാ അവിതക്കഅവിചാരോ സിയാ ന വത്തബ്ബോ സവിതക്കസവിചാരോതിപി, അവിതക്കവിചാരമത്തോതിപി, അവിതക്കഅവിചാരോതിപി.

ദസായതനാ അവിതക്കഅവിചാരാ. മനായതനം സിയാ സവിതക്കസവിചാരം, സിയാ അവിതക്കവിചാരമത്തം, സിയാ അവിതക്കഅവിചാരം. ധമ്മായതനം സിയാ സവിതക്കസവിചാരം, സിയാ അവിതക്കവിചാരമത്തം, സിയാ അവിതക്കഅവിചാരം, സിയാ ന വത്തബ്ബം സവിതക്കസവിചാരന്തിപി, അവിതക്കവിചാരമത്തന്തിപി, അവിതക്കഅവിചാരന്തിപി.

പന്നരസ ധാതുയോ അവിതക്കഅവിചാരാ. മനോധാതു സവിതക്കസവിചാരാ. മനോവിഞ്ഞാണധാതു സിയാ സവിതക്കസവിചാരാ, സിയാ അവിതക്കവിചാരമത്താ, സിയാ അവിതക്കഅവിചാരാ. ധമ്മധാതു സിയാ സവിതക്കസവിചാരാ, സിയാ അവിതക്കവിചാരമത്താ, സിയാ അവിതക്കഅവിചാരാ, സിയാ ന വത്തബ്ബാ സവിതക്കസവിചാരാതിപി, അവിതക്കവിചാരമത്താതിപി, അവിതക്കഅവിചാരാതിപി.

സമുദയസച്ചം സവിതക്കസവിചാരം. നിരോധസച്ചം അവിതക്കഅവിചാരം. മഗ്ഗസച്ചം സിയാ സവിതക്കസവിചാരം, സിയാ അവിതക്കവിചാരമത്തം, സിയാ അവിതക്കഅവിചാരം. ദുക്ഖസച്ചം സിയാ സവിതക്കസവിചാരം, സിയാ അവിതക്കവിചാരമത്തം, സിയാ അവിതക്കഅവിചാരം, സിയാ ന വത്തബ്ബം സവിതക്കസവിചാരന്തിപി, അവിതക്കവിചാരമത്തന്തിപി, അവിതക്കഅവിചാരന്തിപി.

നവിന്ദ്രിയാ അവിതക്കഅവിചാരാ. ദോമനസ്സിന്ദ്രിയം സവിതക്കസവിചാരം. ഉപേക്ഖിന്ദ്രിയം സിയാ സവിതക്കസവിചാരം, സിയാ അവിതക്കഅവിചാരം. ഏകാദസിന്ദ്രിയാ സിയാ സവിതക്കസവിചാരാ, സിയാ അവിതക്കവിചാരമത്താ, സിയാ അവിതക്കഅവിചാരാ.

തയോ അകുസലഹേതൂ സവിതക്കസവിചാരാ. ഛ ഹേതൂ സിയാ സവിതക്കസവിചാരാ, സിയാ അവിതക്കവിചാരമത്താ, സിയാ അവിതക്കഅവിചാരാ. കബളീകാരോ ആഹാരോ അവിതക്കഅവിചാരോ. തയോ ആഹാരാ സിയാ സവിതക്കസവിചാരാ, സിയാ അവിതക്കവിചാരമത്താ, സിയാ അവിതക്കഅവിചാരാ. പഞ്ച ഫസ്സാ അവിതക്കഅവിചാരാ. മനോധാതുസമ്ഫസ്സോ സവിതക്കസവിചാരോ. മനോവിഞ്ഞാണധാതുസമ്ഫസ്സോ സിയാ സവിതക്കസവിചാരോ, സിയാ അവിതക്കവിചാരമത്തോ, സിയാ അവിതക്കഅവിചാരോ. പഞ്ച വേദനാ… പഞ്ച സഞ്ഞാ… പഞ്ച ചേതനാ… പഞ്ച ചിത്താ അവിതക്കഅവിചാരാ മനോധാതു സവിതക്കസവിചാരാ, മനോവിഞ്ഞാണധാതു സിയാ സവിതക്കസവിചാരാ, സിയാ അവിതക്കവിചാരമത്താ, സിയാ അവിതക്കഅവിചാരാ.

(൧) രൂപദുകം

൧൦൪൩. പഞ്ചന്നം ഖന്ധാനം കതി രൂപാ, കതി അരൂപാ…പേ… സത്തന്നം ചിത്താനം കതി രൂപാ, കതി അരൂപാ?

രൂപക്ഖന്ധോ രൂപം. ചത്താരോ ഖന്ധാ അരൂപാ. ദസായതനാ രൂപാ. മനായതനം അരൂപം. ധമ്മായതനം സിയാ രൂപം, സിയാ അരൂപം. ദസ ധാതുയോ രൂപാ. സത്ത ധാതുയോ അരൂപാ. ധമ്മധാതു സിയാ രൂപാ, സിയാ അരൂപാ. തീണി സച്ചാനി അരൂപാ. ദുക്ഖസച്ചം സിയാ രൂപം, സിയാ അരൂപം. സത്തിന്ദ്രിയാ രൂപാ. ചുദ്ദസിന്ദ്രിയാ അരൂപാ. ജീവിതിന്ദ്രിയം സിയാ രൂപം, സിയാ അരൂപം. നവ ഹേതൂ അരൂപാ. കബളീകാരോ ആഹാരോ രൂപം. തയോ ആഹാരാ അരൂപാ. സത്ത ഫസ്സാ അരൂപാ. സത്ത വേദനാ… സത്ത സഞ്ഞാ… സത്ത ചേതനാ സത്ത ചിത്താ അരൂപാ.

(൨) ലോകിയദുകം

൧൦൪൪. പഞ്ചന്നം ഖന്ധാനം കതി ലോകിയാ, കതി ലോകുത്തരാ? ദ്വാദസന്നം ആയതനാനം കതി ലോകിയാ, കതി ലോകുത്തരാ? അട്ഠാരസന്നം ധാതൂനം കതി ലോകിയാ, കതി ലോകുത്തരാ? ചതുന്നം സച്ചാനം കതി ലോകിയാ, കതി ലോകുത്തരാ…പേ… സത്തന്നം ചിത്താനം കതി ലോകിയാ, കതി ലോകുത്തരാ?

രൂപക്ഖന്ധോ ലോകിയോ. ചത്താരോ ഖന്ധാ സിയാ ലോകിയാ, സിയാ ലോകുത്തരാ. ദസായതനാ ലോകിയാ. ദ്വേ ആയതനാ സിയാ ലോകിയാ, സിയാ ലോകുത്തരാ. സോളസ ധാതുയോ ലോകിയാ. ദ്വേ ധാതുയോ സിയാ ലോകിയാ, സിയാ ലോകുത്തരാ. ദ്വേ സച്ചാ ലോകിയാ. ദ്വേ സച്ചാ ലോകുത്തരാ.

ദസിന്ദ്രിയാ ലോകിയാ. തീണിന്ദ്രിയാ ലോകുത്തരാ. നവിന്ദ്രിയാ സിയാ ലോകിയാ, സിയാ ലോകുത്തരാ. തയോ അകുസലഹേതൂ ലോകിയാ. ഛ ഹേതൂ സിയാ ലോകിയാ, സിയാ ലോകുത്തരാ. കബളീകാരോ ആഹാരോ ലോകിയോ. തയോ ആഹാരാ സിയാ ലോകിയാ, സിയാ ലോകുത്തരാ. ഛ ഫസ്സാ ലോകിയാ. മനോവിഞ്ഞാണധാതുസമ്ഫസ്സോ സിയാ ലോകിയോ, സിയാ ലോകുത്തരോ. ഛ വേദനാ ലോകിയാ. മനോവിഞ്ഞാണധാതുസമ്ഫസ്സജാ വേദനാ സിയാ ലോകിയാ, സിയാ ലോകുത്തരാ. ഛ സഞ്ഞാ ലോകിയാ. മനോവിഞ്ഞാണധാതുസമ്ഫസ്സജാ സഞ്ഞാ സിയാ ലോകിയാ, സിയാ ലോകുത്തരാ. ഛ ചേതനാ ലോകിയാ. മനോവിഞ്ഞാണധാതുസമ്ഫസ്സജാ ചേതനാ സിയാ ലോകിയാ, സിയാ ലോകുത്തരാ. ഛ ചിത്താ ലോകിയാ. മനോവിഞ്ഞാണധാതു സിയാ ലോകിയാ, സിയാ ലോകുത്തരാതി.

അഭിഞ്ഞാ ദ്വേ സാരമ്മണാ, ദിട്ഠാ കുസലവേദനാ;

വിപാകാ ച ഉപാദിന്നാ, വിതക്കം രൂപലോകിയാതി.

ധമ്മഹദയവിഭങ്ഗോ നിട്ഠിതോ.

വിഭങ്ഗപകരണം നിട്ഠിതം.