൧. ഉപ്പാദകകമ്മം

൧൦൨൧. ദേവാതി. തയോ ദേവാ – സമ്മുതിദേവാ [സമ്മതിദേവാ (സ്യാ.)], ഉപപത്തിദേവാ, വിസുദ്ധിദേവാ.

സമ്മുതിദേവാ നാമ – രാജാനോ, ദേവിയോ, കുമാരാ.

ഉപപത്തിദേവാ നാമ – ചാതുമഹാരാജികേ [ചാതുമ്മഹാരാജികേ (സീ. സ്യാ.)] ദേവേ ഉപാദായ തദുപരി ദേവാ.

വിസുദ്ധിദേവാ നാമ – അരഹന്തോ വുച്ചന്തി.

ദാനം ദത്വാ, സീലം സമാദിയിത്വാ, ഉപോസഥകമ്മം കത്വാ കത്ഥ ഉപപജ്ജന്തി? ദാനം ദത്വാ, സീലം സമാദിയിത്വാ, ഉപോസഥകമ്മം കത്വാ അപ്പേകച്ചേ ഖത്തിയമഹാസാലാനം സഹബ്യതം ഉപപജ്ജന്തി, അപ്പേകച്ചേ ബ്രാഹ്മണമഹാസാലാനം സഹബ്യതം ഉപപജ്ജന്തി, അപ്പേകച്ചേ ഗഹപതിമഹാസാലാനം സഹബ്യതം ഉപപജ്ജന്തി, അപ്പേകച്ചേ ചാതുമഹാരാജികാനം ദേവാനം സഹബ്യതം ഉപപജ്ജന്തി, അപ്പേകച്ചേ താവതിംസാനം ദേവാനം സഹബ്യതം ഉപപജ്ജന്തി, അപ്പേകച്ചേ യാമാനം ദേവാനം സഹബ്യതം ഉപപജ്ജന്തി, അപ്പേകച്ചേ തുസിതാനം ദേവാനം സഹബ്യതം ഉപപജ്ജന്തി, അപ്പേകച്ചേ നിമ്മാനരതീനം ദേവാനം സഹബ്യതം ഉപപജ്ജന്തി, അപ്പേകച്ചേ പരനിമ്മിതവസവത്തീനം ദേവാനം സഹബ്യതം ഉപപജ്ജന്തി.