൩. അരൂപധാതു

൧൦൦൩. പഞ്ചന്നം ഖന്ധാനം കതി അരൂപധാതുപരിയാപന്നാ, കതി ന അരൂപധാതുപരിയാപന്നാ…പേ… സത്തന്നം ചിത്താനം കതി അരൂപധാതുപരിയാപന്നാ, കതി ന അരൂപധാതുപരിയാപന്നാ?

൧൦൦൪. രൂപക്ഖന്ധോ ന അരൂപധാതുപരിയാപന്നോ; ചത്താരോ ഖന്ധാ സിയാ അരൂപധാതുപരിയാപന്നാ, സിയാ ന അരൂപധാതുപരിയാപന്നാ.

ദസായതനാ ന അരൂപധാതുപരിയാപന്നാ; ദ്വേ ആയതനാ സിയാ അരൂപധാതുപരിയാപന്നാ, സിയാ ന അരൂപധാതുപരിയാപന്നാ.

സോളസ ധാതുയോ ന അരൂപധാതുപരിയാപന്നാ; ദ്വേ ധാതുയോ സിയാ അരൂപധാതുപരിയാപന്നാ, സിയാ ന അരൂപധാതുപരിയാപന്നാ.

തീണി സച്ചാനി ന അരൂപധാതുപരിയാപന്നാനി.

ദുക്ഖസച്ചം സിയാ അരൂപധാതുപരിയാപന്നം, സിയാ ന അരൂപധാതുപരിയാപന്നം.

ചുദ്ദസിന്ദ്രിയാ ന അരൂപധാതുപരിയാപന്നാ; അട്ഠിന്ദ്രിയാ സിയാ അരൂപധാതുപരിയാപന്നാ, സിയാ ന അരൂപധാതുപരിയാപന്നാ.

തയോ അകുസലഹേതൂ ന അരൂപധാതുപരിയാപന്നാ; ഛ ഹേതൂ സിയാ അരൂപധാതുപരിയാപന്നാ, സിയാ ന അരൂപധാതുപരിയാപന്നാ.

കബളീകാരോ ആഹാരോ ന അരൂപധാതുപരിയാപന്നോ; തയോ ആഹാരാ സിയാ അരൂപധാതുപരിയാപന്നാ, സിയാ ന അരൂപധാതുപരിയാപന്നാ.

ഛ ഫസ്സാ ന അരൂപധാതുപരിയാപന്നാ; മനോവിഞ്ഞാണധാതുസമ്ഫസ്സോ സിയാ അരൂപധാതുപരിയാപന്നോ, സിയാ ന അരൂപധാതുപരിയാപന്നോ.

ഛ വേദനാ…പേ… ഛ സഞ്ഞാ … ഛ ചേതനാ… ഛ ചിത്താ ന അരൂപധാതുപരിയാപന്നാ; മനോവിഞ്ഞാണധാതു സിയാ അരൂപധാതുപരിയാപന്നാ, സിയാ ന അരൂപധാതുപരിയാപന്നാ.