൫. വിതക്കത്തികം

൧൦൪൨. പഞ്ചന്നം ഖന്ധാനം കതി സവിതക്കസവിചാരാ, കതി അവിതക്കവിചാരമത്താ, കതി അവിതക്കഅവിചാരാ…പേ… സത്തന്നം ചിത്താനം കതി സവിതക്കസവിചാരാ, കതി അവിതക്കവിചാരമത്താ, കതി അവിതക്കഅവിചാരാ?

രൂപക്ഖന്ധോ അവിതക്കഅവിചാരോ. തയോ ഖന്ധാ സിയാ സവിതക്കസവിചാരാ, സിയാ അവിതക്കവിചാരമത്താ, സിയാ അവിതക്കഅവിചാരാ. സങ്ഖാരക്ഖന്ധോ സിയാ സവിതക്കസവിചാരോ, സിയാ അവിതക്കവിചാരമത്തോ, സിയാ അവിതക്കഅവിചാരോ സിയാ ന വത്തബ്ബോ സവിതക്കസവിചാരോതിപി, അവിതക്കവിചാരമത്തോതിപി, അവിതക്കഅവിചാരോതിപി.

ദസായതനാ അവിതക്കഅവിചാരാ. മനായതനം സിയാ സവിതക്കസവിചാരം, സിയാ അവിതക്കവിചാരമത്തം, സിയാ അവിതക്കഅവിചാരം. ധമ്മായതനം സിയാ സവിതക്കസവിചാരം, സിയാ അവിതക്കവിചാരമത്തം, സിയാ അവിതക്കഅവിചാരം, സിയാ ന വത്തബ്ബം സവിതക്കസവിചാരന്തിപി, അവിതക്കവിചാരമത്തന്തിപി, അവിതക്കഅവിചാരന്തിപി.

പന്നരസ ധാതുയോ അവിതക്കഅവിചാരാ. മനോധാതു സവിതക്കസവിചാരാ. മനോവിഞ്ഞാണധാതു സിയാ സവിതക്കസവിചാരാ, സിയാ അവിതക്കവിചാരമത്താ, സിയാ അവിതക്കഅവിചാരാ. ധമ്മധാതു സിയാ സവിതക്കസവിചാരാ, സിയാ അവിതക്കവിചാരമത്താ, സിയാ അവിതക്കഅവിചാരാ, സിയാ ന വത്തബ്ബാ സവിതക്കസവിചാരാതിപി, അവിതക്കവിചാരമത്താതിപി, അവിതക്കഅവിചാരാതിപി.

സമുദയസച്ചം സവിതക്കസവിചാരം. നിരോധസച്ചം അവിതക്കഅവിചാരം. മഗ്ഗസച്ചം സിയാ സവിതക്കസവിചാരം, സിയാ അവിതക്കവിചാരമത്തം, സിയാ അവിതക്കഅവിചാരം. ദുക്ഖസച്ചം സിയാ സവിതക്കസവിചാരം, സിയാ അവിതക്കവിചാരമത്തം, സിയാ അവിതക്കഅവിചാരം, സിയാ ന വത്തബ്ബം സവിതക്കസവിചാരന്തിപി, അവിതക്കവിചാരമത്തന്തിപി, അവിതക്കഅവിചാരന്തിപി.

നവിന്ദ്രിയാ അവിതക്കഅവിചാരാ. ദോമനസ്സിന്ദ്രിയം സവിതക്കസവിചാരം. ഉപേക്ഖിന്ദ്രിയം സിയാ സവിതക്കസവിചാരം, സിയാ അവിതക്കഅവിചാരം. ഏകാദസിന്ദ്രിയാ സിയാ സവിതക്കസവിചാരാ, സിയാ അവിതക്കവിചാരമത്താ, സിയാ അവിതക്കഅവിചാരാ.

തയോ അകുസലഹേതൂ സവിതക്കസവിചാരാ. ഛ ഹേതൂ സിയാ സവിതക്കസവിചാരാ, സിയാ അവിതക്കവിചാരമത്താ, സിയാ അവിതക്കഅവിചാരാ. കബളീകാരോ ആഹാരോ അവിതക്കഅവിചാരോ. തയോ ആഹാരാ സിയാ സവിതക്കസവിചാരാ, സിയാ അവിതക്കവിചാരമത്താ, സിയാ അവിതക്കഅവിചാരാ. പഞ്ച ഫസ്സാ അവിതക്കഅവിചാരാ. മനോധാതുസമ്ഫസ്സോ സവിതക്കസവിചാരോ. മനോവിഞ്ഞാണധാതുസമ്ഫസ്സോ സിയാ സവിതക്കസവിചാരോ, സിയാ അവിതക്കവിചാരമത്തോ, സിയാ അവിതക്കഅവിചാരോ. പഞ്ച വേദനാ… പഞ്ച സഞ്ഞാ… പഞ്ച ചേതനാ… പഞ്ച ചിത്താ അവിതക്കഅവിചാരാ മനോധാതു സവിതക്കസവിചാരാ, മനോവിഞ്ഞാണധാതു സിയാ സവിതക്കസവിചാരാ, സിയാ അവിതക്കവിചാരമത്താ, സിയാ അവിതക്കഅവിചാരാ.