(൩൩. ക) അരിയാനം അദസ്സനകമ്യതാ

൯൩൪. തത്ഥ കതമാ അരിയാനം അദസ്സനകമ്യതാ? തത്ഥ കതമേ അരിയാ? അരിയാ വുച്ചന്തി ബുദ്ധാ ച ബുദ്ധസാവകാ ച. യാ ഇമേസം അരിയാനം അദസ്സനകമ്യതാ അദട്ഠുകമ്യതാ അസമേതുകമ്യതാ അസമാഗന്തുകമ്യതാ – അയം വുച്ചതി ‘‘അരിയാനം അദസ്സനകമ്യതാ’’.

(ഖ) സദ്ധമ്മം അസോതുകമ്യതാ

തത്ഥ കതമാ സദ്ധമ്മം അസോതുകമ്യതാ? തത്ഥ കതമോ സദ്ധമ്മോ? ചത്താരോ സതിപട്ഠാനാ, ചത്താരോ സമ്മപ്പധാനാ, ചത്താരോ ഇദ്ധിപാദാ, പഞ്ചിന്ദ്രിയാനി, പഞ്ച ബലാനി, സത്ത ബോജ്ഝങ്ഗാ, അരിയോ അട്ഠങ്ഗികോ മഗ്ഗോ – അയം വുച്ചതി ‘‘സദ്ധമ്മോ’’. യാ ഇമസ്സ സദ്ധമ്മസ്സ അസോതുകമ്യതാ അസവനകമ്യതാ അനുഗ്ഗഹേതുകമ്യതാ അധാരേതുകമ്യതാ – അയം വുച്ചതി ‘‘സദ്ധമ്മം അസോതുകമ്യതാ’’.

(ഗ) ഉപാരമ്ഭചിത്തതാ

തത്ഥ കതമാ ഉപാരമ്ഭചിത്തതാ? തത്ഥ കതമോ ഉപാരമ്ഭോ? യോ ഉപാരമ്ഭോ അനുപാരമ്ഭോ ഉപാരമ്ഭനാ അനുപാരമ്ഭനാ അനുപാരമ്ഭിതത്തം ഉഞ്ഞാ അവഞ്ഞാ പരിഭവോ രന്ധഗവേസിതാ – അയം വുച്ചതി ‘‘ഉപാരമ്ഭചിത്തതാ’’.